Matatagalan pa ang pagbabalik sa Pilipinas ni Miss Grand International 2025 Emma Mary Tiglao.
Isa siya sa mga napipisil ni Miss Grand International founder Nawat Itsaragrisil bilang host ng mga maliliit na pagtitipon ng Miss Universe 2025 na idaraos sa Thailand.
Hindi lamang pinuno ng Miss Grand International Organization si Itsaragrisil dahil executive director din siya ng Miss Universe Organization.
Ipinagkatiwala kay Itsaragrisil ang pamamahala sa mga programa at gabi ng koronasyon ng 74th edition ng Miss Universe sa Nobyembre 21, 2025, kaya may kapangyarihan siyang isali si Emma bilang host ng Miss Universe activities.
Read: Emma Mary Tiglao clinches back-to-back Miss Grand International crown for the Philippines
EMMA MARY TIGLAO TO HOST MISS UNIVERSE 2025 EVENTS
Nakumpirma ang mga plano ni Itsaragrisil para kay Emma dahil nakunan ng video ang kanilang pag-uusap.
Sabi niya sa Filipina beauty queen: “I think homecoming celebrate after Miss Universe coronation better because you’re so busy and we want to know exactly the result of the contest… of the pageant.
“But I will let you work during the time Miss Universe event… I will put you in the host, small event, some events.”
Sa pagkakaalam ni Itsaragrisil, meron nang 125 official candidates ang Miss Universe 2025, pero tiyak na madaragdagan pa ang bilang nito.
Ikinagalak ni Emma ang ibinalita ni Itsaragrisil dahil isang bagong karanasan para sa kanya ang magkaroon ng partisipasyon sa Miss Universe 2025.
Nahasa ang pagsasalita ni Emma sa harap ng mga tao at sa telebisyon dahil sa trabaho nito bilang news anchor ng news program ng Eagle Broadcasting Corporation.
Mapakikinabangan niya ito nang husto bilang host ng Miss Universe 2025 activities.
Nangangahulugan din ito ng matagal na pananatili niya sa Thailand kaya hindi pa siya makakauwi sa Pilipinas sa lalong madaling panahon para sa kanyang inaabangang homecoming parade.