“I hope it is not arson.”
Ito ang reaksiyon ni dating Department of Public Works and Highways (DPWH) Secretary Rogelio Singson sa tanong ni Senate President Tito Sotto tungkol sa sunog na nangyari sa tanggapan ng DPWH-Bureau of Research and Standards sa Quezon City, noong Miyerkules, Oktubre 22, 2025.
Naganap ang talakayan nina Sotto at Singson sa pagdinig ng Senate Committee on Justice sa Senate Bill No.1215, ang panukala tungkol sa paglikha sa Independent People’s Commission, isang bagong ahensya laban sa katiwalian.
Dumalo si Singson bilang miyembro ng Independent Commission for Infrastructure (ICI) na nag-iimbestiga sa mga anomalya sa flood control projects ng pamahalaan.
Tanong ni Sotto, "I just want to know what is there in the DPWH Quezon City office that was burning a few hours ago?"
Makahulugang sagot ni Singson, "I hope it is not arson."
Read: DPWH, tiniyak na walang nasirang flood-control documents sa sunog
WHAT'S THE CAUSE OF FIRE?
Habang nagaganap ang sunog sa DPWH-Bureau of Research and Standards, naglabas ang DPWH ng pahayag na ang pinagmulan ng apoy ay ang sumabog na computer.
Sinabi rin nila na, diumano, wala sa gusali ang mga dokumentong may kaugnayan sa iniimbestigahang mga anomalya sa mga proyekto sa flood control.
“Initial findings indicate that the fire originated from a computer unit inside the Materials Testing Division that reportedly exploded. No employees were harmed during the incident,” bahagi ng pahayag ng DPWH.
Pero ayon sa Bureau of Fire Protection (BFP), electrical ignition dahil sa short circuit ang dahilan ng naganap na sunog.
Saad ng BFP: “Based on the initial spot report, the fire was caused by electrical ignition due to a short circuit in the ceiling of the Records Section located on the third floor of the building.
“The incident remains under investigation to determine the circumstances surrounding the case.”
Ang DPWH-Bureau of Research and Standards ang sangay ng ahensya na responsable sa pagsusuri at pagtatakda ng pamantayang nagtataguyod ng construction innovation at pagpapabuti sa public infrastructure.
Dito rin ginagawa ang mga pagsusuri ng materyales para sa DPWH Region IV-B.
Read: 3 materials that make homes more earthquake-resistant, according to an architect
FORMER OFFICE OF BRICE HERNANDEZ'S EX-WIFE
Nababanggit sa mga ulat tungkol sa naganap na sunog ang pangalan ni Engineer Mel Clarisse Sto. Domingo, ang ex-wife ni Brice Hernandez.
Si Hernandez ang assistant district engineer ng DPWH Bulacan na sinibak sa puwesto dahil sa bintang na pagnanakaw mula sa pondo ng flood control projects.
Nagbitiw si Sto. Domingo mula sa puwesto ilang linggo matapos siyang i-promote ni dating DPWH Secretary Manuel Bonoan bilang officer-in-charge ng Office of the Division Chief, Technical Services Division of the Bureau of Research and Standards.
Setyembre 1, 2025 nang ihain ni Sto. Domingo ang kanyang resignation letter na may bisa noong Setyembre 19, 2025.
Sa ulat ng Radio Mindanao Network (RMN), kinumpirma ni DPWH-Bureau of Research and Standards Director III Engineer Juliana Vergara na dating nag-o-opisina sa ikatlong palapag ng kanilang tanggapan ang nagbitiw sa tungkuling ex-wife ni Hernandez.
Sa panayam naman sa kanya ng mga miyembro ng media, muling iginiit ni Vergara na walang nasunog na mga dokumentong may kinalaman sa flood control anomalies.
“Wala po kaming dokumento dito na tungkol dun sa mga project na under investigation,” paglilinaw ni Vergara.