Dalawang araw bago ang paggunita sa All Saints Day o Araw ng mga Santo, inilabas ng Viva Films ang official poster ng launching movie ng loveteam nina Rabin Angeles at Angela Muji, ang Philippine adaptation ng blockbuster 2012 South Korean movie na A Werewolf Boy.
Read: Rabin Angeles, Angela Muji todo ang workshop for A Werewolf Boy
Hindi nalalayo ang lay-out ng official poster ng pelikula nina Rabin at Angela sa poster ng South Korean film na pinagbidahan nina Song Joong Ki (Descendants of The Sun) at Park Bo Young (Strong Girl Bong Soon).
Pero sa Filipino adaptation poster, ang pangalan ni Lorna Tolentino ang nakatawag ng pansin.
Kasama si Lorna sa cast ng launching movie ng RabGel loveteam at importante sa kuwento ang karakter na kanyang ginampanan.
Isang malaking karangalan para kina Rabin at Angela na tinanggap ni Lorna ang alok na maging bahagi ito ng kanilang pinakahihintay at pinapangarap na pagbibida sa pelikula.
Kung hindi pa inilabas ng Viva Films ang official poster ng Philippine adaptation ng A Werewolf Boy, hindi malalaman ng publiko na kasali si Lorna sa proyekto na nakatakda ang theatrical release sa Enero 2026.
Ibinahagi rin ni Lorna sa kanyang social media followers ang poster ng pelikula na hudyat ng muling pagbabalik niya sa Viva Films, ang film outfit na producer noon ng kanyang hit films.
Read: Rabin Angeles, ire-remake ang sikat na movie ni Song Joong Ki
LORNA TOLENTINO MOVIES UNDER VIVA FILMS
Ang Sinasamba Kita (1982), Init Sa Magdamag (1983), Sana Bukas Pa Ang Kahapon (1982), Maging Akin Ka Lamang (1987), Pusong Mamon (1998), Abakada…Ina (2001) at Felix Manalo (2015) ang ilan lamang sa maraming proyekto ni Lorna sa Viva Films.
Ang Narito Ang Puso Ko na ipinalabas sa mga sinehan noong Setyembre 30,1992 ang isa sa mga hindi malilimutan na pelikula ni Lorna sa Viva Films dahil sa kanyang grandslam victory nang manalo siya na best actress noong 1993 sa lahat ng mga award-giving body.