Ginugunita ngayong Sabado, Nobyembre 1, 2025, ang All Saints Day.
At tulad ng mga nakaraan na taon, hindi nakakaligtaan ng mga tagahanga na bisitahin ang puntod ng kanilang mga iniidolo at namayapa na artista.
Ang libingan ni Rico Yan (Marso 14,1975-Marso 29, 2002) sa Manila Memorial Park, Parañaque City ang isa sa mga dinarayo ng kanyang mga tagasuporta.
Hindi nawawalan ng mga bumibisita sa mga puntod nina Julie Vega (Mayo 21,1968- Mayo 6,1985) at German Moreno (Oktubre 4,1933-Enero 8, 2016) sa Loyola Memorial Park, Marikina City.
Sa Manila North Cemetery, ang magkatabi na himlayan ng mag-asawang Fernando Poe, Jr. (Agosto 20,1939- Disyembre 14, 2004) at Susan Roces (Hulyo 28,1941-Mayo 20, 2022) ang pangunahin na atraksyon dahil sa mga kababayan natin na nagbibigay-pugay sa mga showbiz icon na tinagurian bilang King and Queen of Philippine Movies.
Nananatiling buhay sa matatapat na tagahanga ni Nora Aunor (Mayo 21, 1953 – Abril 16, 2025) ang kanyang alaala. At kahit hindi All Saints Day, binibisita nila ang puntod at nag-aalay sila ng panalangin para sa kapayapaan ng kaluluwa ng nag-iisang Superstar na nakalibing sa Libingan ng Mga Bayani, Taguig City.
Dumadalaw rin tuwing All Saints Day sa huling hantungan ni King of Comedy Dolphy (Hulyo 25,1928-Hulyo 10,2012) at action superstar Rudy Fernandez (Marso 3,1952-Hunyo 7, 2008) sa Heritage Park, Taguig City ang mga taga-subaybay na nagmamahal sa kanila.
May mga artista na namayapa tulad ng ilang mga miyembro ng That’s Entertainment na hindi napantayan ang popularidad nina Nora, Fernando, Susan, Julie, Rico, Rudy at Dolphy, pero hindi sila nakaligtaan na alalahanin ng kanilang mga kasamahan.
THAT'S ENTERTAINMENT STARS: IN MEMORIAM
Ngayong Sabado sa pamamagitan ng isang Facebook post, nagbigay-pugay ang That’s Entertainment sa mga miyembro ng programa na sumakabilang-buhay.
At karapat-dapat na bigyan ng pagpapahalaga ang mga alaala gaya nina Jon Hernandez, Strawberry, Ronnel Victor, Lester Samonte, Denver Razon, at Aileen Esguerra.
Kasama rin sina Francis Magalona, Marco Polo Garcia, Richie Gonzaga, Abel Montenegro, Jonathan Darca, Filio Salazar, Dan Yniguez, Michael Angelo, at Marc Tejada.
Binigyang-pugay din sina Isabel Granada, John Salve, Eddie Delos Santos, Romano Vasquez, John Regala, Ricky Rivero, at Ian Crosby.
Pinakahuli si Piwee Polintan, ang vocalist ng Jeremiah band na namatay noong Oktubre 28, 2025 nang dahil sa stroke.
Nakatulong ang In Memoriam post ng That’s Entertainment para malaman ng masugid na manonood ng programa na namayapa na ang ilan sa mga miyembro na kanilang sinusuportahan pero wala na silang balita mula nang magpaalam sa telebisyon noong Mayo 1996 ang youth-oriented show na dati nilang tinatangkilik.