Dalawang taong pagkakakulong ang hatol kay Miss Grand International 2021 Nguyen Thuc Thuy Tien ng korte sa Hanoi, Vietnam, ngayong Miyerkules, Nobyembre 19, 2025.
Ito ay dahil sa pagpo-promote ng Vietnamese beauty queen sa kanyang social media channels ng Kera Supergreens Gummis na mayaman umano sa fiber.
Kasama niyang nahatulang guilty sa kasong fraud ang social media influencers na sina Pham Quang Linh at Hang Du Muc.
Read: Angelica Panganiban reveals agreement with husband about her showbiz comeback
Napatunayan ng korte na alam ng tatlo na 0.935 percent lamang ang fiber content ng gummy candies na kanilang ipinu-promote na malinaw na panlilinlang sa mga tao.
Unang dinakip si Tien dahil sa kasong fraud noong Mayo 2025.
Makalipas ang anim na buwan, tumanggap siya at ang kanyang mga kasama ng parusang dalawang taong pagkakabilanggo.
Sinabi ng korte na sadyang ginawa ng mga akusado ang paglabag para magkaroon ng malaking halaga ng pera mula sa ilegal na paraan kaya nararapat lamang sa kanila ang mahigpit na parusa.
THE TRUTH ABOUT Nguyen Thuc Thuy Tien's GUMMY CANDIES
Sa pagsisiyasat ng mga imbestigador, natuklasang gumagamit ang gummy candies ng 30% sorbitol, isang artificial sweetener na may epekto sa digestive system.
Noong Disyembre 2024, ipinakilala ni Tien ang gummy candy na iniendorso nila na may katumbas umanong isang plato ng gulay.
Tatlumpong porsyento ang bahagi ni Tien mula sa kompanyang itinatag nila ng kanyang mga kasosyo.
Mahigit sa 129,000 na pakete ng gummy candies, na nagkakahalaga ng US$650,000, ang naibenta ng mga akusado sa halos 56,000 customers.
Ibig sabihin, kumita sila ng US$473,000.
Nakilala at sumikat si Tien sa Vietnam nang mapanalunan niya ang korona at titulong Miss Grand International 2021 sa Bangkok, Thailand.
Si Samantha Panlilio ang kinatawan ng Pilipinas sa patimpalak-kagandahan sa Thailand na nilahukan nila ni Tien.