Ang pagpirma ng kasunduan sa pagitan ng TV5, MediaQuest, Cignal, at ni Willie Revillame na magaganap ngayong Biyernes ng hapon, Nobyembre 28, 2025, ang kumpirmasyong walang katotohanan ang mga balitang hindi na babalik sa Kapatid Network ang TV host.
Matagal nang hindi nakikita ng publiko si Willie mula nang magpaalam siya sa kanyang programang Wil To Win noong Pebrero 10, 2025 para kumandidato bilang senador sa halalang idinaos noong Mayo 12, 2025.
Wilyonaryo ang pamagat ng bagong game show ni Willie.
Marami ang nagtaka nang dumalaw kay Willie sina MediaQuest/Cignal President Jane Basas at Cignal First Vice-President Sienna Olaso sa studio niya sa Wil Tower noong Nobyembre 17, 2025 dahil sa balitang hindi na siya babalik sa TV5.
Read: Wilyonaryo studio ni Willie Revillame, binisita ng TV5 execs
WILLIE REVILLAME TO HAVE HIS OWN TV CHANNEL ON CIGNAL
Mali ang mga akala dahil nakatakda ngayong Biyernes ang pagpirma ni Willie ng kontrata.
Kabilang sa mga kasunduan ang pagkakaroon niya ng sariling TV channel na may pangalang Wil TV, na ibinigay sa kanya ng Cignal at ni TV5 Chair Manny V. Pangilinan o MVP.
Mapapanood sa Wil TV ang Wilyonaryo, na may segment na "Lucky Pick" na aprubado ng PAGCOR at Security and Exchange Commission (SEC).
Isang milyong piso ang araw-araw na ipamimigay ni Willie sa mapapalad na magwawagi sa "Lucky Pick."
Noong Huwebes, Nobyembre 27, nakita si Willie na bumisita sa itinatayong malaking studio sa TV5 compound sa Mandaluyong City — patunay na hindi rin totoo ang balitang hindi na matutuloy ang nabanggit na proyekto.
Tinatayang nagkakahalaga ng PHP600 million ang state-of-the-art studio na business partnership nina Willie at MVP.
Diumano, ang studio ang pinakamalaki sa buong Pilipinas.
Napabalitang hindi na magkakaroon ng katuparan ang pagpapatayo ng studio, pero lumitaw na walang katotohanan ito.
Kaya mahirap paniwalaan ang mga espekulasyon hangga’t hindi nanggagaling ang kumpirmasyon mula kay Willie, na madalas ginugulat ang publiko dahil sa kanyang mahirap mahulaan at hindi inaasahang mga aksyon at desisyon.
Read: Husband wins PHP226M lotto jackpot prize; hides it from wife