Nagkaroon ng malakas na hinalang posibleng ang aktor at basketball player na si Ricci Rivero, 27, ang tinutukoy ni Richard Gomez na bagong manliligaw ng anak nitong si Juliana Gomez, 25.
Sa panayam ni Richard sa Fast Talk With Boy Abunda noong Nobyembre 24, 2025, ikinuwento ng actor-politician na maraming nanliligaw sa nag-iisang anak nila ni Ormoc City Mayor Lucy Torres-Gomez.
Read: Richard Gomez hindi pa handa kung mag-aasawa na si Juliana
Pagbabahagi ni Richard: “Meron nanliligaw ngayon. Alam ko nag-break sila nung isang boyfriend niya.
"Pero a few months ago, parang may nanliligaw ulit. Umaaligid-aligid.
“May nakita ako one time, e. Sabi ko, 'Juliana, saan ka?' 'I’m here.'
“'What are you doing there?' 'I am having dinner with this guy.'
“Tapos one time, may dinner kami, isinama, e. 'Ah, yan pala yun.'”
Hindi binanggit ni Richard ang pangalan ng kasama ni Juliana sa hapunan nila.
Hindi mahigpit na ama si Richard, pero hindi siya nakalilimot paalalahanan ang kanyang anak: “Just be happy lang and alam mo naman yung limitations mo. Dalaga ka, maganda ka, hindi ka pa kasal, so may limits.”
Read: Miggy Bautista, hindi na-intimidate sa mga magulang ng girlfriend na si Juliana Gomez
RICCI SUPPORTS JULIANA'S SEA GAMES BID
Malakas ang dudang si Ricci ang manliligaw ni Juliana na tinutukoy ni Richard dahil madalas nakikitang magkasama ang dalawa.
Noong Martes, Disyembre 16, kasama si Claudia Barretto, nakita si Ricci na sinuportahan ang fencing game ni Juliana sa 33rd Southeast Asian Games na kasalukuyang nagaganap sa Bangkok at Chonburi, Thailand.
Marami ang nagulat at nagtaka nang makita nila si Ricci sa Thailand dahil hindi siya miyembro ng Philippine basketball team na kalahok sa SEA Games 2025.
Umugong ang balitang nagkakamabutihan sina Ricci at Juliana dahil sa unang pagkakataon ay nasilayan sila ng publiko na magkasama.
Nakunan ito ng mga larawan at video ng mga miyembro ng Philippine media na may coverage sa SEA Games.
Walang masama kung sakaling nanliligaw si Ricci kay Juliana.
Mismong si Richard ang nagsabing nakipaghiwalay na ang anak nito sa dating karelasyon — ang fencer ding si Miggy Bautista — ilang buwan na ang nakararaan.
Hindi rin isyu ang panunuyo Ricci kay Juliana dahil matagal na silang hiwalay ng kanyang dating girlfriend, ang former beauty queen at Los Baños, Laguna councilor na si Leren Bautista.
Isang taon na ang nakalilipas buhat nang mangyari ang tahimik at maayos na paghihiwalay nina Ricci at Leren, pero sinusubaybayan pa rin nila ang Instagram account ng isa’t isa dahil nananatili silang magkaibigan.
Dati ring girlfriend ni Ricci ang aktres na si Andrea Brillantes.
Mula nang lumabas ang impormasyong sinuportahan ni Ricci ang fencing game ni Juliana sa 33rd SEA Games, marami ang nakapuna at nagsabing bagay ang dalawa.
Sabi nila, tulad ni Richard na dating matinee idol ay tall, dark, and handsome din daw si Ricci.
Read: Marie Lozano absuwelto sa kasong libel ni Gretchen Fullido