Nagbitiw si Mark Adrian Napiza bilang chairman ng Sangguniang Kabataan ng Barangay Bubukal, Sta. Cruz, Laguna.
Ito ay kaugnay ng kontrobersiyang kinasasangkutan niya: ang paghawak niya sa mga siopao at hotdog na paninda ng isang convenience store noong Pebrero 15, 2026.
Umani siya ng mga batikos at pagkondena dahil sa kanyang inasal.
Mabilis na kumalat ang video ni Napiza habang hinahawakan nito ang mga pagkaing itinitinda sa convenience store kaya naging pambansang usapin ang ginawa niya.
Read: SK Chairman sa Laguna binatikos sa insidente sa convenience store
napiza's resignation letter
Pebrero 20, 2026 ang petsa ng pagbibitiw ni Napiza sa tungkulin.
Ito ang kabuuan ng nilagdaang liham ng pagbaba ni Napiza mula sa kanyang posisyon:
“Ako po si Mark Adrian P. Napiza ay nagbibitiw sa aking tungkulin bilang SK Chairperson ng Barangay Bubukal, Santa Cruz, Laguna.
“Naging masaya po ako sa paglilingkod bilang isang Sangguniang Kabataan Chairperson ng mahigit kumulang walong taon sa aming barangay.
“Nais ko po magpasalamat sa lahat ng aking nakasama bilang isang lingkod-bayan, sa buong Sangguniang Barangay ng Bubukal, Sangguniang Kabataan ng Bubukal, Pamahalaang Bayan ng Santa Cruz at sa Pambayang Pederasyon ng mga Sangguniang Kabataan sa bayan ng Santa Cruz, Laguna.
“Sa lahat ng masasayang gawain bilang isang lingkod-bayan at sa mga aral na aking natutunan na aking dadalhin, kahit saan man ako makarating. Asahan niyo pa rin ang aking kooperasyon sa lahat ng programa ng Sangguniang Kabataan sa ating bayan.
“Bilang pagdidisiplina sa aking sarili dahil sa aking nagawang mali bilang isang lingkod-bayan, ako ay kusang-loob na bumababa sa aking tungkulin bilang SK Chairperson ng Barangay Bubukal, epektibo rin ngayong araw, ika-20 ng Pebrero 2026.
"Maraming-maraming salamat po.”
Read: Laguna SK chairman, nag-apologize sa convenience store incident
Bago ang pagbibitiw sa puwesto ni Napiza, nauna nang naghain ng administrative complaint (for conduct prejudicial to the best interest of the service) laban sa kanya si Sta. Cruz, Laguna Mayor Benjo Agarao.
Hindi pa naglalabas ng pahayag si Agarao kung itutuloy pa nito ang reklamo laban kay Napiza, na nagpadala ng sulat ng pagbibitiw kay SK Federation Chair Mark Anthony Molina.
Read: SK chairman, sinampahan ng reklamo ng Sta. Cruz, Laguna mayor