Ang 2018 Pulitzer Prize-winning journalist na si Manuel Mogato at ang kapwa niya multi-awarded journalist na si Ed Lingao ang napagtuunan ng atensiyon ni Jasmine Curtis-Smith dahil sa panayam nila kay Quezon City Fourth District Representative Bong Suntay.
Sina Mogato at Lingao ang mga host ng Storycon, isa sa mga programa ng ONE News channel.
Noong Martes, Marso 3, 2026, si Suntay ang kanilang panauhin at tinalakay nila ang sexist remarks ng kongresista tungkol sa nakatatandang kapatid ni Jasmine na si Anne Curtis.
Read: QC congressman, binatikos dahil sa komento kay Anne Curtis
Noong araw na iyon ay naging mainit na balita ang pahayag ni Suntay sa pagdinig ng House Committee on Justice kaugnay ng pangatlong impeachment complaint laban kay Vice-President Sara Duterte.
Sa nasabing pagdinig, ipinipilit ni Suntay na wala umanong sedition o political destabilization sa naging pahayag ni VP Duterte at hindi dapat kasuhan.
Bilang halimbawa, ibinahagi ni Suntay ang insidente kung saan nakita niya umano si Anne sa isang hotel.
Ayon kay Suntay, dahil sa kagandahan ng aktres, naramdaman daw niyang may "nag-init" sa damdamin niya at "na-imagine kung ano ang puwedeng mangyari."
Sa panayam nina Mogato at Lingao kay Suntay sa Storycon, sinabi nitong hindi totoong pangyayari ang pagkakita niya kay Anne sa isang hotel.
Bahagi lamang daw ito ng kanyang imahinasyon upang bigyan diin ang punto niya sa pagtatanggol kay VP Duterte.
ED LINGAO REACTS TO JASMINE'S POST
Pinuna ni Jasmine ang pagtawa umano ng dalawang journalists habang isinasagawa ang interview sa mambabatas.
Inihayag ng Kapuso actress ang saloobin niya tungkol dito sa pamamagitan ng social media post: “BAKIT TUMATAWA UNG MGA LALAKING HOSTS SA PAGTATANONG NILA??????WALA KAYONG INIBA KAY BONG SUNTAY.”
Nakita at nabasa ni Lingao ang reaksiyon ni Jasmine at nagpahayag siya ng pagtataka sa inasal ng nakababatang kapatid ni Anne.
Sa pamamagitan ng kanyang Facebook post noong Miyerkules, Marso 4, nagkomento si Lingao tungkol sa pagkukumpara sa kanila ni Jasmine kay Suntay.
Inalmahan din ni Lingao ang komento ng ilang netizens na ginawang isyu na dalawang lalaki ang nag-interbyu kay Suntay at pagbibigay rito ng platform.
Saad ng beteranong mamamahayag (published as is): "Wala raw kaming ipinag-kaiba.
"Napanood kaya niya ang buong interview bago magtweet?
"Yung iba namang nagkokomento na takot daw kami at bahag ang buntot kaya kami natatawa — I seriously don't think we have the same threshold for fear.
"At yung isa naman diyan na lahat na lang ng bagay ay i-fraframe na, ah kasi lahat kayo ay lalaki at kung may babae man ay token lamang, you unfortunately give feminism a bad name.
"You make an issue over the fact that we — gahd, two men! — interviewed Suntay thus giving him a platform; perhaps you would have preferred that we not question him and just take potshots from the sidelines like everyone else?
"Or since you are so hung up over gender roles, perhaps we should have just waited for a female anchor to be available to do the interview?"
Kalakip ng mensahe ni Lingao ang screenshot ng komento ni Jasmine sa X (Twitter).
Read: Celebrities call out Bong Suntay over remarks about Anne Curtis
JASMINE CURTIS-SMITH REACTS TO ED LINGAO'S POST
Nakarating kay Jasmine ang komento ni Lingao tungkol sa kanyang post.
Sa pamamagitan ng X kagabi, Marso 4, ni-repost ni Jasmine ang screenshot ng Facebook post ni Lingao.
Makahulugan caption ng aktres dito: "Interesting."
Makalipas ang dalawang oras ay muling nag-post si Jasmine upang bigyan ng konteksto ang nauna niyang post.
Ayon sa aktres, bagamat pinagsisihan niya ang paghahantulad kina Mogato at Lingao kay Suntay, pinaninindigan niya ang sinabing walang lugar ang pagtawa sa isang diskusyon tungkol sa mga komento na minamaliit ang mga kababaihan.
Buong post ni Jasmine: "I regret likening the hosts to Bong Suntay, that was too strong and said in frustration.
"I still stand by the point that laughter has no place in a discussion about remarks that diminish women.
"This is a long-standing issue that generations of women have had to confront, and it deserves to be treated with seriousness. I hope the conversation continues to focus on the remark itself and why comments that disrespect women should be called out clearly."
AWARD-WINNING JOURNALISTS
May mga nagtanggol kina Mogato at Lingao laban sa paratang ni Jasmine.
Kung napanood umano ng aktres ang kabuuan ng panayam, mapapansin niyang natawa ang mga host ng Storycon sa absurd o kalokohan at mahirap tanggaping pangangatwiran ni Suntay.
Ipinipilit ng Quezon City congressman na walang mali sa analogy niya. Pero kinabukasan, inihingi niya ng paumanhin ang kanyang inasal dahil sa matitinding batikos na natanggap mula sa iba’t ibang sektor ng lipunan.
Read: Bong Suntay apologizes; insists there was no "malice intended"
May mga nagsabi namang unawain na lamang ang silakbo ng damdamin ni Jasmine dahil labis itong nasaktan sa pambabastos sa kanyang kapatid.
Kaya bukod kay Suntay, napagbalingan din niya ng pansin sina Mogato at Lingao, na parehong award-winning journalist.
Nanalo si Mogato ng Pulitzer Prize for International Reporting noong 2018 dahil sa kanyang paglalantad sa mga brutal na pagpatay sa kampanya ni dating Pangulong Rodrigo Duterte laban sa ilegal na droga.
Tumanggap si Mogato ng international awards mula sa Human Rights Press Award, Amnesty International Media Awards, at Marshall McLuhan fellowship.
Sa kasalukuyan, siya ang defense editor ng ONE News.
Gaya ni Mogato, kinikilala ang husay at pagiging responsable ni Lingao sa larangan ng pamamahayag.
Ginawaran si Lingao ng Marshall McLuhan Fellowship noong 2010.
Noong 2012, pinarangalan siya ng University of the Philippines Alumni Association ng Distinguished Alumnus Award para sa mga kontribusyon niya sa pamamahayag.
Read: Anne Curtis’ mother, sister condemn Rep. Suntay's lewd remarks