Ang paghingi ng public apology kay Anne Curtis at pagsailalim sa gender sensitivity training ang mga parusang ipinataw ng House of Representatives kay Quezon City Fourth District Representative Jesus "Bong" Suntay.
Ito ay matapos mahatulang "guilty" ang mambabatas sa "inappropriate or improper statements" nito tungkol sa aktres at iba pa nitong pahayag sa social media.
Inaprubahan ng ethics panel ng House of Representatives ang rekomendasyong parusahan si Suntay base sa 263 boto ng mga kongresista.
Bahagi ng committee report na inilabas ng panel chair na si 4PS Party-list Representative JC Abalos: “After deliberation on the cases, the Committee found Quezon City 4th District Rep. Jesus ‘Bong’ C. Suntay guilty of disorderly behavior for uttering inappropriate or improper statements during the March 3, 2026 hearing of the House Committee on Justice, as well as for related statements made on social media that the Committee said reflected negatively on the dignity, integrity, and reputation of the House of Representatives as an institution.
“The Committee recommended that Suntay be subjected to disciplinary action in the form of a reprimand under Section 52(b)(2), Rule IX of the Committee Rules.
“It also recommended that he render voluntary community service, undergo a gender sensitivity seminar organized by the House Committee on Women and Gender Equality, and issue a public apology to Ms. Anne Curtis-Smith and all women in a statement to be read before television or broadcast media.”
Napatunayan ng committee na "offensive, "sexist," at may diskriminasyon laban sa mga kababaihan ang mga salitang binitiwan ni Suntay.
Hindi raw ito naaayon sa inaasahang dignidad mula sa mga miyembro ng Kongreso at sa paglabag niya sa Sections 4(A)(b) and (c) of Republic Act No. 6713, or the Code of Conduct and Ethical Standards for Public Officials and Employees.
Read: QC congressman, binatikos dahil sa komento kay Anne Curtis
INAPPROPRIATE COMMENTS ABOUT ANNE CURTIS
Tumanggap si Suntay ng mga batikos dahil sa kanyang pahayag tungkol kay Anne sa pagdinig ng House Committee on Justice sa kaso ng impeachment ni Vice-President Sara Duterte, noong Marso 3, 2026.
Inalmahan ng publiko ang pahayag na ito ni Suntay: "Alam ninyo, minsan, nasa Shangri-La ako, nakita ko si Anne Curtis, ang ganda-ganda pala niya.
“You know, may desire sa loob ko na nag-init talaga, na-imagine ko na lang kung anong puwedeng mangyari. Pero siyempre hanggang imagination na lang yon.
“Pero hindi naman siguro ako puwedeng kasuhan kung ano ang na-imagine ko.”
Kabilang si Anne sa mga nagreklamo laban kay Suntay, pero hindi pa siya naglalabas ng reaksiyon tungkol sa pagkastigo at mga parusang ipinataw ng House of Representatives sa mambabatas.