Humingi ng paumanhin si Anne Curtis nang mapaluha siya dahil naalaala niya ang kanyang amang si James Ernest Curtis Smith na pumanaw noong Enero 2, 2026.
Nangyari ang pag-iyak ni Anne sa thanksgiving media conference na inihanda ng Viva Artists Agency para sa kanya nitong Huwebes ng gabi, Hunyo 18, sa Greyhound Café, Ayala Triangle, Makati City.
Hindi napigilan ni Anne ang pagpatak ng luha nito nang tanungin siya tungkol sa career advice na ibinigay sa kanya ni Viva big boss Vic del Rosario noong nag-uumpisa pa lamang ang showbiz career niya sa edad na 12.
Saad niya: “Actually, ang sinasabi lang niya sa akin, 'Mabait ka. Lagi kang mabait,' which is naano ko naman.
"I practically grew up with Ninong Vic. Para na siyang daddy ko. And one thing he told my dad..."
Sa puntong ito ay biglang napaluha si Anne.
Paliwanag niya: “Sorry, I just remembered my dad.
"I’ll never forget what he [Boss Vic] told my dad, ‘I promise, I will make your daughter into a star.’
“And my dad was eternally grateful to Boss Vic. So, sayang lang we’re gonna plan like…
“I know Ninong Vic wanted to do a contract signing kasi we’re gonna renew, even if I don’t need to renew with them kasi, obviously, my loyalty will always be with Viva.
"But it would have been a great reunion with Ninong Vic and my dad.
"Sadly, my dad passed earlier this year.”
Dalawampu’t siyam (29) na taon nang contract star ng Viva si Anne.
Read: Ama nina Anne Curtis at Jasmine Curtis-Smith sa Australia pumanaw
ANNE RECALLS BEING STRANDED AMID US/ISRAEL-IRAQ WAR
Matagal hindi nagkaroon ng pagkakataon ang entertainment press na makausap si Anne.
Ang karanasan niya nang sumiklab ang giyera sa pagitan ng US-Israel at Iraq noong Pebrero 2026 ang itinanong sa kanya ng Cabinet Files.
Dumalo noon si Anne sa Milan Fashion Week sa Italy.
Mula rito, lumipad siya noong Marso 1 papunta sa Dubai, United Arab Emirates, dahil doon sila magkikita ng kanyang asawang si Erwan Heussaff at ng kanilang anak na si Dahlia.
Pero bumalik sa Italy ang eroplanong sinasakyan niya.
Read: Anne Curtis’s Dubai flight diverted amid Middle East tensions
Pagbabahagi ni Anne: “It was a very terrifying experience, I would have to say.
“Actually, nasa eroplano na ako noon palipad na ng Dubai. Halfway there na kami nung biglang nag-announce yung pilot that we should buckle up kasi the plane will be returning to Milan.
“Buti na lang, may Filipino stewardess. Sabi ko, ‘Ano pong nangyari?’ 'Meron pong airstrike in Dubai.'
“Yung heart ko, talagang nag-drop, kasi kaka-landing lang sa Dubai ng family ko, Erwan and Dahlia.
"So, di ba, nakakapraning talaga siya, e.
“And then it was chaos in the airport kasi all the flights were getting cancelled, so I was finding everyway possible to reach them.
"Na parang sinasabi nila, 'Meet mo na lang sila sa Manila.'
“Sabi ko, 'Hindi. Hindi ganoon yon. Gagawa ako ng paraan na makarating sa Dubai, whatever.'
"But Erwan had heard news that the border was still open to enter Oman.”
Hindi sinunod ni Anne ang payo na magkita na lamang sila ng kanyang mag-ama sa Maynila. Pinanindigan niya ang pagpunta sa Oman.
Mula sa Dubai, bumiyahe ng walong oras by land sina Erwan at Dahlia para makarating sa Oman at makipagkita kay Anne.
Saad ng aktres: “It’s like an eight-hour drive. Alam mo, hindi ako makatulog.
"Tapos sinasabi ko, 'Can you please i-on yung live tracking so you’ll know if my battery would get drained.'
"So, hindi ka matahimik kasi night travel pa sila ng eight hours.
“So, dun [Oman] kami nagkita at nakagawa ng paraan para makauwi.
"And sobrang helpful din ng mga Filipino community natin dun kasi tulong-tulong talaga.
"Thank you, Lord, we reunited and everyone was safe.”
Read: Anne Curtis reunites with husband Erwan, daughter Dahlia in Oman