Humingi ng paumanhin ang namamahala ng Startista Gallery ng Star City kay Pops Fernandez dahil ang estatwa ng singer na gawa sa resin ang isa sa mga tumanggap ng mga batikos at negatibong komento mula sa publiko.
Ang Startista Gallery ang sinasabing Philippine version ng sikat na Madame Tussauds Wax Museum na inilunsad noong Biyernes, Hunyo 19, 2026.
Pero nang lumabas sa social media ang larawan ng mga istatwa ng mga artista, kabilang ang life-size statue ni Pops sa mga pinuna.
Read: Ian de Leon responds to sister Lotlot's tirades against him
POPS FERNANDEZ REACTS TO HER STATUE
Mabilis na nakarating kay Pops ang kontrobersiyal na usapin, kahit nasa Las Vegas siya, dahil sa reaksiyon ng kanyang mga tagahanga at nagmamalasakit na mga kaibigan.
Nangako ang pamunuan ng Startista Gallery na aayusin nila ang istatwa ni Pops.
Diumano, kinuha nila ang serbisyo ng isang bagong artist dahil top priority nila ang pag-aayos sa pinag-uusapang life-size statue ni Pops.
Kabilang ang panganay na anak ni Pops na si Robin Nievera sa mga nagkomento tungkol sa hitsura ng estatwa ng kanyang ina.
“Damn. I thought my mom's was bad," sabi ni Robin.
Tila ang tinutukoy ni Robin ay ang anyo ng ibang estatwa ng mga artistang nakita niya gaya nina Lucy Torres-Gomez, Ashtine Olviga, Wilbert Ross, Bea Binene, Ruffa Gutierrez, Diana Zubiri, Gladys Reyes, Richard Gomez, Michael V., at Paolo Contis.
Hindi rin natiis ni Pops na huwag magbigay ng opinyon at suhestiyon sa pamamagitan ng kanyang social media post.
Nag-post siya ng larawan niya at mensahe na “Sana po ganito man lang” at may peace at loving emojis.
STARTISTA GALLERY ARTIST
Si Jerry Santos ang lead artist ng Startista Gallery.
Noong Hunyo 20 ay ibinahagi niya sa kanyang Facebook page ang saloobin sa panlalalit ng ibang netizens sa mga nilikha niyang istatwa.
Saad niya: "Marami mang nanlait sa mga social media posts, nakita naming masaya sa resulta ang client (Star City) at ang mga celebrities na pinag basehan namin -yun ang pinaka-importante sa lahat. Salamat po sa tiwala!
"Sa lahat ng mga artists na involved dito sa StarTista Gallery, gusto ko lang malaman nyo na proud ako sa inyong lahat. Hindi natin kailangan validation ng iba, para sa akin isa ito sa best project na nagawa natin."
Read: Lotlot breaks down in tears over Ian feud: "He can have it all!"