Mahigit tatlong dekada na sa showbiz industry ang award-winning actor na si Mon Confiado.
Nagsimula ang kanyang acting career noong 1992 sa Shake, Rattle & Roll IV, at mula noon ay nakagawa na siya ng mahigit 300 pelikula.
Pero sa dami ng kanyang mga naging proyekto, may isang karakter na nananatiling pinakamahalaga para sa kanya — bilang si Emilio Aguinaldo sa Heneral Luna (2015) at Quezon (2025).
“Ang Emilio Aguinaldo roles, yan ang nag-define sa akin. Marami akong nagawa na magaganda ang karakter ko pero ang problema, hindi blockbuster. Yung Heneral Luna [2015] kasi blockbuster kaya nahila ako [paitaas],” ani Mon.
MON CONFIADO TAKES ON NEW CHALLENGE IN VMX MOVIE
Ngayon, muli siyang haharap sa panibagong hamon bilang bida sa VMX movie na Ang Modista.
Ayon kay Mon, hindi siya nagdalawang-isip na tanggapin ang proyekto dahil nagustuhan niya ang kuwento at ang karakter na kanyang gagampanan.
Saad ng aktor: “Medyo na-challenge ako. Number one, yung script, tapos gusto ko yung direktor [Ronald Batallones] dahil magaganda ang mga script at track record niya.
“Challenge sa akin ang VMX. Nabibilib ako sa VMX kasi alam natin ito lang ang gumagawa, e.
"Siguro sa tanda ko na sa industriya natin, hindi ko tinitingnan kung sexy. Wala na akong worries.
“In fact, kahit naman noong nagsisimula ako, gumagawa ako nang mga ganyan.
“Hindi sexy na ako ang ibinebenta. Sina Gardo Verzosa yon, yung mga sumikat pero ako, laging kontrabida sa mga pelikula ng Seiko Films, El Niño Films."
Hindi rin itinanggi ni Mon na nakasabay siya noon sa uso ng sexy pictorials, bagamat hindi iyon ang naging sentro ng kanyang karera.
Co-stars ni Mon sa Ang Modista sina Micaella Raz at Kim Yashii.
Read: Ruru Madrid explains why he now respects brother-in-law Kai Sotto
WHY MON CONFIADO NO LONGER WANTS TO PRODUCE MOVIES
Sa tagal ni Mon sa industriya, may kakayahan na rin sanang mag-produce ng sarili niyang pelikula, lalo na para sa VMX.
Gayunman, sinabi ni Mon na wala na siyang planong pasukin muli ang produksiyon dahil sa hindi magandang karanasan niya noon.
Paliwanag niya: “Alam naman natin na medyo mahirap mag-produce ng pelikula sa panahon ngayon, although ang VMX talaga ang pinaka-possible na venue ng mga producer dahil magsa-submit ng script, aaprubahan ng Viva.
"Kapag na-approve, magpo-produce ka na lang. Kumbaga, binili na nila.
“Napaso na ako kasi dati may mga ganyan ako. Nag-produce ako noon, tulad ng Room Service. Walang bumalik [sa puhunan].
"Kasi nung time na yon, mahirap talaga. Kahit sa Cinemalaya, nakikipag-co prod ako."
Dagdag pa ng beteranong aktor, wala rin siyang balak pasukin ang pagdidirek. Mas gusto raw niyang manatiling artista.
Read: Pinoy pickpocket hunter vows to continue advocacy despite Facebook takedown
THE GREATEST INHERITANCE FROM HIS FATHER
Bukod sa kanyang mahabang karera, ipinagmamalaki rin ni Mon ang pamana sa kanya ng kanyang amang si Angel Confiado, isang batikang character actor na pumanaw noong Oktubre 21, 2006, sa edad na 93.
Sa dami ng pelikulang nagawa ni Mon, nalampasan na niya ang rekord ng kanyang ama bilang aktor.
Pero pagdating sa negosyo at investments, aminado si Mon na hindi niya matutumbasan ang husay ng kanyang ama.
Si Angel ang nagmamay-ari noon ng malawak na ari-arian sa kanto ng EDSA at Aurora Boulevard sa Cubao, Quezon City, na ngayo'y nagkakahalaga na ng daan-daang milyong piso.
“Magaling sa investment ang tatay ko, matandang tao kasi. Pati sa Sampaloc, maraming properties yon,” pagmamalaki ni Mon.
Gayunman, para sa kanya, higit sa anumang ari-arian ang pinakamahalagang ipinamana ng kanyang ama—ang talento sa pag-arte, isang pamana na hindi kailanman mananakaw.
Read: Ruru Madrid explains why he now respects brother-in-law Kai Sotto