Personal na dinalaw ni Niño Muhlach si Nicolas Villanueva sa isang ospital sa Antipolo City noong Martes, Agosto 25, 2026, upang matiyak na maayos ang kalagayan nito.
Si Villanueva ang biktima na nasugatan sa vehicular accident na nangyari noong Linggo, Agosto 23.
Inamin ni Niño na nakatulog siya habang nagmamaneho ng kanyang sasakyan, na bumangga sa ilang establisimyento sa Marcos Highway, Barangay Mambugan, Antipolo City.
Kabilang si Villanueva sa mga nadamay sa insidente.
Inako ni Niño na siya ang may kasalanan sa aksidente at taus-puso siyang humingi ng paumanhin sa mga biktima.
Nakipag-ugnayan na rin ang dating Child Wonder sa kanyang contractor para sa pagpapaayos at pagpapagawa sa mga establisimyentong napinsala ng kanyang sasakyan.
Read: Niño Muhlach admits falling asleep at the wheel in Antipolo crash
NIÑO MUHLACH VISITS NICOLAS VILLANUEVA
Nakipag-ugnayan ang Cabinet Files kay Niño ngayong Miyerkules, Agosto 26, at ibinahagi niya ang kanyang personal na pagbisita kay Villanueva sa ospital.
Nagpaunlak din ang aktor na magkuwento tungkol sa kasalukuyang kalagayan ng biktima.
“I just personally visited Nicolas Villanueva sa ospital to check on his condition.Siya yung aking natamaan sa aksidente na nangyari," bungad ng aktor.
Ayon kay Niño, gumaganda na ang kondisyon ni Villanueva at patungo na ito sa tuluyang paggaling.
“I am relieved and grateful to share that he is doing much better and is now on the road to a full recovery."
Nilinaw rin ng aktor na walang bali si Villanueva, bagamat nagtamo ito ng mga pasa at sugat sa mga binti.
“To clear up any concerns, wala naman po siyang bali. He sustained bruises and cuts on his legs, but the hospital is taking great care of him," sabi ni Niño.
NIÑO MUHLACH APOLOGIZES TO VILLANUEVA, FAMILY
Ayon kay Niño, isa sa mga dahilan ng kanyang pagbisita ay upang personal na humingi ng paumanhin kay Villanueva at sa pamilya nito.
“I went there to personally apologize to Nicolas and his family. Sinabi ko sa kanya na hindi ko naman siya pababayaan.
“I take full accountability for this incident because it was my fault. Thank you so much to everyone who reached out with care and concern."
Nanawagan din siya ng patuloy na panalangin para sa mabilis at tuluyang paggaling ni Villanueva.
“Maraming salamat po sa inyong mga dasal, and let’s please continue praying for Nicolas’s swift and complete recovery,” ani Niño.
Tumanggap ng mga papuri si Niño dahil sa pag-ako niya sa kanyang pagkakamali, pagtupad sa kanyang mga responsibilidad, at pagtiyak na hindi niya pababayaan ang mga nasangkot sa aksidente.
Read: Niño Muhlach placed under 90-day preventive suspension by LTO