Natatandaan pa rin ng publiko ang aktres na si Pinky Montilla, 68, dahil sa kanyang iconic movie na Supergirl, na ipinalabas sa mga sinehan noong Setyembre 23, 1973.
Limampu’t tatlong taon na ang nakalilipas mula nang magbida si Pinky sa pelikulang hango sa DC Comics character na Supergirl.
Hindi pa mahigpit noon ang mga patakaran tungkol sa copyrights at trademarks kaya nakagawa ang Pilipinas ng sariling bersiyon ng Supergirl.
Hanggang ngayon, napapanood pa rin sa YouTube ang black-and-white film ni Pinky, kabilang ang hindi malilimutang eksena ng kanyang karakter na nakikipaglaban sa isang higanteng palaka.
Matagal nang tinalikuran ni Pinky ang showbiz at tahimik na siyang naninirahan sa Utah, USA.
Ganunman, pinaunlakan niya ang hiling ng Cabinet Files na makapanayam siya.
PINKY'S CHILDHOOD AND EDUCATION
Ibinahagi ni Pinky ang kanyang background at kung paano siya lumaki bago pumasok sa showbiz.
“I was born in Manila on August 9, 1958.
"My father was a sugar planter in Negros Occidental and was a mayor of Isabela, Negros Occidental, for sixteen years.
“My mom was a teacher.
"Masasabi ko na okay naman ang naging buhay namin.
"I went to school, elementary until high school, sa Centro Escolar University sa Manila.
"And I graduated from De La Salle University with a Bachelors Degree in Psychology.”
Read: Hazel Espinosa reacts to viral The Buzz clash with Sabrina M.
HOW PINKY ENTERED SHOWBIZ
Nagsimula ang acting career ni Pinky noong dekada '70.
Bata pa lamang daw siya ay gusto na niyang maging artista, kahit tutol dito ang kanyang pamilya.
Lahad niya: “My career as an actress began in the 1970s.
"My first movie was Ganid Sa Laman [1970] with Rita Gomez, Luis Gonzales, Eddie Gutierrez, and Dindo Fernando.
"I was about 12 years old.
“Bata pa lang ako, gusto ko nang mag-artista pero my family was against it, but I insisted.
"So my grandmother, Julia Montilla Mapa, decided to put up Prima Production which became my mother studio.”
Kalaunan, nagkaroon siya ng title role sa pelikulang Pinky.
Pero sa lahat ng kanyang proyekto, ang Supergirl ang itinuturing niyang signature film.
Ani Pinky: “My first title role movie was Pinky, but I am proud to say that Supergirl was my signature film, at marami pa rin ang nakaka-remember of that movie.
“I have fond memories while making Supergirl dahil ito talaga ang dahilan kaya naging household name ako.”
PINKY ON HER "SUPERGIRL" MEMORIES
Bagamat naging malaking bahagi ng kanyang career ang Supergirl, aminado si Pinky na hindi naging perpekto ang ilang eksena sa pelikula.
“Some of the scenes were not perfect, especially ang flying scenes at fight scenes ko sa giant palaka.
“Medyo maraming takes kasi there were times na ulan nang ulan so we need to wait until the rain stopped,” pagbabalik-tanaw niya.
Makalipas ang maraming dekada, nakararating pa rin kay Pinky pamilya ang kanyang legacy bilang artista dahil sa clips ng Supergirl na napapanood online.
“My children had seen clips of Supergirl sa YouTube, and my grandson didn’t know I was in the movies before until my daughter told him about my being an actress, nagulat siya,” lahad ni Pinky.
Read: Mommy Pinty confirms Alex Gonzaga has welcomed a baby boy
WHY PINKY LEFT SHOWBIZ
Nagpasya si Pinky na iwan ang showbiz at manirahan sa Amerika nang maging mas popular ang sexy movies.
Sa pagkakatanda niya, ang Harabas at Kidlat, na pinagbidahan nina Robin Artistorena at Jess Lapid Jr., ang huli niyang pelikula noong 1979.
Ipinaliwanag ni Pinky kung bakit niya piniling tuluyang umalis sa industriya.
Saad niya: “The reason I quit showbiz was my career got stalled. Nauso din yung sexy movies and I was not ready to do those kind of projects.
“And also, I needed a chance to find myself where I can just be me without having to put up a facade for everyone.”
PINKY MONTILLA’S LIFE IN AMERICA
Dahil galing siya sa showbiz, hindi naging madali para kay Pinky ang panibagong buhay sa Amerika.
Nagtrabaho raw silang mabuti ng kanyang asawang si Howard Petersen para sa kanilang pamilya.
Si Howard ang direktor ng Supergirl, at ito rin ang nakatuklas kay Pinky at naging daan upang makapasok siya sa pag-arte.
“I married Howard Petersen who discovered me. I used to call him Tito kasi he’s twelve years older than me.
"Howard is my lola's adopted son but not legally.
“We have two children, Jessica Julia, 40 years old, and Justine Claudia, 38 years old.
"I have two grandchildren. Brysen is 20 years old and Lola will be two years old this September," lahad ni Pinky.
Aminado si Pinky na naging malaking adjustment para sa kanya ang buhay sa Amerika, lalo na't nakasanayan niya noon ang may mga tumutulong sa bahay.
“Mahirap din sa umpisa ang buhay namin sa Amerika. Kayod lang kami nang kayod ng husband ko.
“Hindi ako sanay na walang maid, driver, at yaya para sa dalawang anak namin. But I think it made me mature and independent.”
Sa paglipas ng panahon, natutunan daw niyang pahalagahan ang tahimik na buhay na malayo sa showbiz.
“I like my life here dahil tahimik at walang drama. Hindi rin ako masyadong nagpupunta sa Filipino social parties or events.
“I love my privacy. Suplada raw ako, pero sa totoo lang, I'm quite a loner. Gusto ko tahimik,” ani Pinky.
PINKY MONTILLA MISSES SHOWBIZ
Bagamat kuntento na si Pinky sa kanyang tahimik na buhay sa Utah, hindi nito itinangging nami-miss din niya paminsan-minsan ang entertainment industry.
Patuloy pa rin daw ang komunikasyon niya sa ilan niyang dating kaibigan sa showbiz, kabilang sina Gina Alajar at Allan K.
Pagbabahagi ni Pinky: “Si Gina Alajar is a good friend of mine. Once in awhile, we DM [direct message] each other. I love her and I miss her.
"Si Allan K. is also a friend. He’s a childhood friend and, like Gina, we DM sometimes."
Sa panonood naman niya ng mga pelikulang Pilipino sa Netflix, napapaisip si Pinky kung may nakakakilala pa rin sa kanya.
“Medyo nami-miss ko ang showbiz these days, especially kapag nagkakaroon ako ng chance to watch Filipino movies sa Netflix.
"Iniisip ko, may makakakilala pa kaya sa akin?" sabi ni Pinky.
Read: Shirley Kuan says Bea "never defended me" amid wedding issue