Isa ang Viva Films producer na si Vic del Rosario Jr. sa tumanggap ng Lifetime Achievement Award mula sa Film Development Council of the Philippines (FDCP) dahil sa kanyang malaki at hindi matatawarang kontribusyon sa Philippine movie at entertainment industry.
Kasama niyang ginawaran ng Lifetime Achievement Award ang beteranang aktres na si Hilda Koronel, ang film scholar na si Tito Genova Valiente, at ang Manunuri ng Pelikulang Pilipino.
Iginawad kay Boss Vic at iba pang awardees ang parangal sa Closing Ceremony ng Philippine Film Industry Month (PFIM) na ginanap sa Seda Hotel Vertis North, Quezon City, nitong Miyerkules ng gabi, Setyembre 30, 2026.
Kasama ni Boss Vic na dumalo sa nabanggit na pagtitipon ang kanyang mga anak na sina Vincent, Veronique, Valerie, VR; mga apo; at ang partner niya, ang dating beauty queen at aktres na si Joanne Santos.
Si Aga Muhlach ang nagpakilala kay Boss Vic bilang Lifetime Achievement Awardee ng FDCP.
"Boss Dad" ang tawag ni Aga kay Boss Vic dahil ito ang unang nagbigay sa kanya ng malaking oportunidad na magbida sa isang pelikula, ang Bagets, noong 1984.
Mula noon hanggang ngayon, nananatiling aktibo si Aga sa entertainment industry at kinikilala bilang isa sa pinakamahuhusay na aktor sa Pilipinas.
Read: Patrick Garcia speaks about split with Jennylyn Mercado 18 years later
BOSS VIC'S ACCEPTANCE SPEECH
“Maraming salamat sa Film Development Council of the Philippines sa Lifetime Achievement Award na ito.
"Sixty years na ako sa music business at halos 45 years na ako sa pelikula, pero hanggang ngayon, excited pa rin ako sa bawat bagong proyekto na ginagawa namin,” umpisa ng mensahe ng pasasalamat ni Boss Vic nang igawad sa kanya ni FDCP Chair Jose Javier Reyes ang Lifetime Achievement Award.
“Nung sinimulan namin ang Viva noong 1981, ang kasama ko noon ay si Mina Salvador at ang aking kapatid na si Tess del Rosario-Cruz.
“Si Sharon Cuneta ang una naming artista, ang una naming direktor ay si Eddie Garcia.
“At nagpapasalamat din ako kay Mayor Pablo Cuneta na tumulong sa amin noong sinimulan ang Viva."
Ang unang pelikulang iprinodyus ng Viva Films ay ang P.S. I Love You (1981), na pinagbidahan nina Sharon Cuneta at Gabby Concepcion.
Pagpapatuloy ni Boss Vic: “Sa lahat ng ating mga artista, direktor, manunulat, crew, mga empleyado, at buong pamilya, lalo na sa apat kong anak — si Vincent, Veronique, Valerie, and VR.
"Sa apat kong apo, lalo na kay Josa [Joanne Santos], thank you.
“Sama-sama nating binuo ito and sana ito ay maiparating sa inyo at, siyempre, sa mga manonood. So, maraming salamat."
Ipinangako rin ni Boss Vic na magpapatuloy pa ang Viva Films sa paggawa ng pelikula sa susunod na limampung taon.
"Ang Viva ay committed for the next fifty years na tumulong sa paggawa ng pelikula.
"In forty-five years, we’ve done 1,000 films, and Viva is committed for the next fifty years, with my children and apo.
"Kasama kong tutulong to do fifty more years of filmmaking,” pangako ni Boss Vic, na tumanggap ng malakas na palakpakan mula sa mga imbitadong bisita.
ANOTHER FIFTY YEARS OF VIVA FILMS
Sa panayam kay Boss Vic, binanggit nito, “Ang bilin ko sa mga anak ko at saka sa mga apo ko, ipagpatuloy natin pa.
"At least kami, e, forty-five years sa movies, sixty years sa music, so hopefully another fifty, sixty years.”
Sinabi ni Boss Vic na hindi siya naniniwala sa mga haka-hakang unti-unti nang namamatay ang Philippine movie industry.
Aniya: “Definitely, it’s not dying.
"Mas madami nang platforms, ang paggawa ng production, hindi nawawala. Dumarami yung avenues.
“Hindi naman nawawala ang mga nanonood sa sinehan. Hindi nawawala ang nanonood sa TV.
"Hindi nawawala ang nanonood sa streaming, mas madami nang platforms.
"Mas mahaba ang buhay ng isang production,”
Giit ni Boss Vic, “Ten years from now, ang pelikulang Pilipino ay lalong sisigla at lalaki."
Read: Bayani Agbayani opens up about Bea-Vincent canceled Spain wedding