Itinuwid ni Andrea Brillantes ang maling akala na hindi pa siya nagkakaroon o lumalabas sa mga programa ng GMA-7.
Naging bahagi siya ng cast ng Cielo de Angelina, ang drama series ng Kapuso Network na pinagbidahan ni Bea Binene at napanood mula Oktubre 22, 2012 hanggang Enero 4, 2013.
Siyam na taong gulang lang si Andrea nang mapanood ito sa Cielo de Angelina, pero hindi na natatandaan ng publiko na nagkaroon siya ng partisipasyon sa nabanggit na drama series.
Nang makausap ng Cabinet Files si Bea, hindi na rin nito maalaalang nagkasama sila ni Andrea sa programa na siya ang bida.
ANDREA RECALLS AUDITIONING FOR MARIMAR ROLE
Si Andrea ang panauhin ni Boy Abunda sa Fast Talk with Boy Abunda ngayong Biyernes, Oktubre 30, 2026.
Dito naman siya nagkuwento tungkol sa pagsali niya noon sa audition para sa karakter ni Cruzita, ang anak ni Marimar sa Philippine adaptation ng Mexican television series na Marimar (Agosto 13, 2007-Marso 14, 2008) na pinangunahan ni Marian Rivera.
Tatlong taon ang edad ni Andrea nang subukan nito ang kapalaran niya sa Marimar, pero hindi siya pinalad mapili.
“Naalaala ko po, I was around three or four years old para sa first audition ko and it was for Marimar.
"Kaso nung time na yon, mahiyain pa ako and hindi pa ako masyadong nakakapagsalita sa harapan ng maraming tao, lalo na nung nakita ko si Miss Marian.
“Super na-starstuck ako. Nakalimutan ko na po lahat ng lines ko noon,” pagbabalik-tanaw ni Andrea sa nakaraan.
Read: Ate Gay in critical condition; relies on life-support machines
CIELO DE ANGELINA
Natuwa at natawa naman si Andrea nang ipakita ang mga eksena niya noon sa Cielo de Angelina dahil sa kanyang batambatang hitsura.
“Ang cute ko naman nung baby pa ako. Ang baby ko pa!” naaaliw na reaksiyon ni Andrea.
“Bata pa po ako niyan. I think I was around nine years old. That was before Anna Liza and yan yung first-ever show ko sa GMA-7.”
Nakilala si Andrea nang piliin siya ng ABS-CBN para magbida sa remake ng Anna Liza, ang 1980 soap opera ng GMA-7 na pinagbidahan ni Julie Vega..
Napanood sa ABS-CBN ang remake ng Anna Liza mula Mayo 2013 hanggang Marso 2014.
Sampung taon si Andrea nang bigyang-buhay niya ang karakter ni Anna Liza na nagbigay sa kanya ng malalaking oportunidad sa entertainment industry, mula noon hanggang ngayon.
Read: Bimby Aquino wants to be Philippine president: "Absolutely!"