Magaganap ngayong tanghali, April 12, ang contract signing ni Ryza Cenon sa ABS-CBN.
Nagsimula ang showbiz career ni Ryza nang sumali siya noong 2004 sa StarStruck, ang reality-based artista search ng GMA Network, Inc.
Siya ang nanalong Ultimate Female Survivor.
Labindalawang taong naging contract star si Ryza ng GMA Artist Center, mula 2004 hanggang 2017.
Noong June 15, 2017, nagdesisyon siyang lumipat sa Viva Artists Agency dahil sa kagustuhan niyang "mag-explore" at gumawa ng mga pelikula.
Natupad agad ang pangarap ni Ryza dahil siya ang lead actress ng Mr.& Mrs. Cruz, ang pelikula ng Viva Films na ipinalabas sa mga sinehan noong January 24, 2018.
Hindi lamang si Ryza ang pumirma ngayon ng kontrata sa Kapamilya Network dahil kasabay niya na nag-renew ng mga kontrata sina Boy Abunda, Martin Nievera, at fellow Viva stars na sina Yam Concepcion at Anne Curtis.