Kinunan noong Sabado, April 21, ang suicide attempt ni Yasmien Kurdi sa pamamagitan ng pagtalon sa Jones Bridge sa Sta. Cruz, Manila.
Ito para sa isang importanteng eksena sa Hindi Ko Kayang Iwan Ka, ang afternoon drama series ng GMA-7 na pinagbibidahan niya.
Dahil sa kagustuhan na maging makatotohanan ang risky scene, hindi pumayag si Yasmien na gumamit ng double nang umakyat siya sa ledge ng Jones Bridge.
Ipinagmalaki ni Yasmien na maganda ang eksena na ginawa niya dahil drone camera ang ginamit ng direktor.
Sabado nang mag-taping sila sa Jones Bridge kaya walang masyadong tao sa naturang lugar.
Nagiging popular ang Jones Bridge sa mga suicide scene sa mga pelikula at teleserye.
Sa 1984 movie na Kaya Kong Abutin ang Langit, tumalon si Clarissa (Maricel Soriano) mula sa Jones Bridge dahil hindi na maatim ng kanyang konsensiya ang kasamaan niya.
Sa Last Night ng Star Cinema (2017), tumalon din mula sa Jones Bridge ang mga karakter nina Piolo Pascual at Toni Gonzaga.