Dinala sa Angono Police Station ngayong araw, August 15, ang 36-year-old na babaeng nahuli na nilalabag ang batas laban sa camcording.
Caught in the act ang suspect habang inire-record niya ang The Day After Valentine's ng Viva Films sa loob ng SM Mall cinema sa Angono, Rizal.
Nangyari ang insidente ngayong hapon, 4 p.m., at ang checker ng Viva Films ang nagdala sa suspect sa police station para sampahan siya ng reklamo.
Tiniyak ng Viva Films management na kakasuhan nila ang suspect para hindi ito tularan ng iba.
Sa tuwing nagsisimula ang screening ng mga pelikula, paulit-ulit at hindi nagkukulang ang theater owners sa pagpapaala sa moviegoers na ipinagbabawal ng Republic Act 10088 o Anti-Camcording Act of 2010 ang illegal na recording ng mga pelikula, visual at audio.
On a lighter note, nagpapasalamat ang Viva Films sa lahat ng mga tumangkilik sa pelikula nina Bela Padilla at JC Santos dahil ito ang top-grosser sa walong pelikula na kalahok sa Pista ng Pelikulang Pilipino na magkakasabay na nagbukas ngayon sa cinemas nationwide.