Si Annabelle Rama ang source ng balitang umiyak ang kanyang anak na si Ruffa Gutierrez nang matanggap nito ang wedding invitation ng ex-husband na si Yilmaz Bektas.
Ikinuwento ni Annabelle sa mga kaibigan sa Wednesday Club—isang grupo ng magkakaibang reporters, producers, at iba pang taga-showbiz na nagbibidahan tuwing Miyerkoles—na umiyak si Ruffa nang malamang muling magpapakasal sa ibang babae ang ama ng dalawang niyang anak.
"Bakit ka umiiyak? Gusto mong bumalik sa kanya para bugbugin ka na naman? Hayaan mo na siya, meron ka na rin namang boyfriend na PG," kuwento ni Annabelle sa reaksiyon niya sa pag-iyak ni Ruffa.
PG ang tawag ni Annabelle sa sinumang nauugnay sa anak. Ibig sabihin nito'y Patay Gutom.
Inamin ni Ruffa sa YES! magazine, sa isang interview noong panahong hiwalay na siya kay Yilmaz, na may mga madilim na panahon sa pagsasama nila ni Yilmaz. Sa mga pagkakataong iyon, sinabi niyang sinasaktan siya, ikinukulong sa walk-in closet para hindi makalabas ng bahay, at sinusugatan.
Ayon kay entertainment columnist Mario Bautista, na personal na nakausap ni Annabelle, gusto ni Yilmaz na dumalo sa kasal nito sa Istanbul, Turkey, ang mga anak nila ni Ruffa na sina Venice at Lorin.
Ikinasal sina Ruffa at Yilmaz sa NBC Tent, The Fort, noong May 25, 2003, pero tumagal lamang ng apat na taon ang pagsasama nila.
Habang kasal si Ruffa kay Yilmaz, lumantad si Solen Görgüzel, isang Turkish-born national, na nagsabing siya ang tunay na partner ni Yilmaz at sa kanya ang bahay na tinitirhan ni Ruffa sa Turkey.
Tumawag siya mula Istanbul para sabihin ito sa YES! Magazine, at nagpadala rin siya ng mga litrato para patunay ng kanyang sinasabi.
Noong March 2010, pumutok ang balitang ikakasal si Yilmaz kay Miss Universe 2006 Zuleyka Rivera, pero hindi nagtagal ang kanilang relasyon.
May mga ibang nakarelasayon na si Zuleyka mula nang maghiwalay sila ni Yilmaz.
May isang anak si Zuleyka sa kanyang ex-boyfriend na si Jose Juan Barea, at ang businessman-producer na si German Rosete Llergo ang karelasyon niya sa kasalukuyan.
WHO IS RUFFA GUTIERREZ'S FIRST HUSBAND?
Bagamat si Yilmaz Bektas ang kilalang asawa ni Ruffa, ang first husband ng unica hija nina Annabelle at Eddie Gutierrrez ay isang nagngangalang Richard Daloia.
Nagpakasal sila sa Las Vegas noong January 19, 1999, at nag-file raw si Ruffa ng divorce noong 2000. Ngunit hindi malinaw kung kailan talaga pinawalang-bisa ang kasal nila.
Sa panayam ng actress-host sa defunct showbiz talk show na Startalk, sinabi nito bilang paliwanag, "When you're young, you do a lot of crazy things. You're impulsive... you're in love."
Maraming nakakakilala kay Ruffa ang nagsasabing si Ruffa ay nagmamahal with her heart, not her head. Ang unang nakaka-attract daw dito ay hindi ang yaman at pangalan ng lalaki, kundi ang itsura nito at kung may chemistry sila.
Tila ito ang pinanggagalingan ng refrain ni Annabelle na PG ang mga nagugustuhan ni Ruffa. Sambid ito ng Gutierrez matriarch kahit sino pa ang ma-link sa anak, liban kay Yilmaz.
Naging usap-usapang nanligaw kay Ruffa, na isang dating beauty queen, sina Dennis Da Silva, Bong Revilla, Zoren Legaspi, John Estrada, John Lloyd Cruz at iba pa.
WHO IS RUFFA GUTIERREZ's BOYFRIEND?
Si Jordan Mouyal ang tinutukoy na current boyfriend ni Ruffa Gutierrez, isang French-Israeli national.
Taong 2014 nung nag-open up ang dating beauty queen tungkol sa kanyang love life. Ayon sa dating beauty queen, "hardworking" ito at hindi iniinda ang mga intriga sa showbiz, maging ang patutsada ng mismong ina ni Ruffa na si Annabelle.
Ang sabi pa Ruffa tungkol sa ibang manliligaw, "Yung mga Pinoy, pag inaaway na ni mommy, nawawala na parang bula! Ito, wala siyang pake as long as I'm nice to him! Even if my mom [says all these things] he just smiles. He says 'Hello.'"