Naging panata at tradisyon na ni Comedy Queen Ai-Ai delas Alas ang magdaos ng Thanksgiving Mass tuwing September 8, ang kaarawan ni Blessed Virgin Mary.
Kaninang umaga, hindi lamang misa ng pasasalamat para sa kaarawan ng Mahal na Ina ang naganap sa covered court ng BF Homes sa Quezon City dahil pinaligaya rin ni Ai-Ai ang mahigit sa 100 na bata na mula sa mahihirap na pamilya, kasama ang kanilang mga magulang at kamag-anak.
Active member si Ai-Ai ng Legion of Mary, Quezon City Chapter at ang mga kasamahan niya sa organisasyon ang tumulong sa kanya para mapagtipun-tipon ang mga bata at ang pamilya nilang kapus-palad.
Ang mga kababayan nating less fortunate ang special guests ni Ai-Ai sa birthday celebration ni Blessed Virgin Mary.
Tumanggap ang mga bata ng mga bag at school supplies, samantalang mga bag na puno ng iba’t ibang klaseng pagkain at de lata naman ang tinanggap ng mga matatandang kasama nila habang tumutugtog ang mga Christmas song.
Lubos ang pasasalamat ng mga invited guest ni Ai-Ai dahil sa pagpapahalagang ibinigay sa kanila ng Comedy Queen.
Ayon kay Ai-Ai, gusto niyang maging makabuluhan ang pagdiriwang nila ng kanyang pamilya sa araw ng pagsilang ng ina ni Jesus Christ, at wala nang hihigit pa sa pagbabahagi sa mga nangangailangan ng mga biyayang ipinagkakaloob sa kanila ng Panginoon.
