Nag-aalburoto ang fans ni Coco Martin na matatalas ang mga mata at pandinig dahil napansin nilang hindi binanggit ni Maine Mendoza ang pangalan ng aktor nang mag-promote ang lead actress ng Jack Em Popoy: The Puliscredibles sa Sunday PinaSaya.
“Ayun, mga Dabarkads, mga Kapuso, Jack Em Popoy po, The Puliscredibles, huwag po n’yong kalimutan, sa December 25 na po ‘yan.
“Marami po kaming kasama diyan, Bossing Vic Sotto, and me myself and I at marami pa pong iba.
“Sana po unahin niyo po yan sa mga sinehan,” ang eksakto, walang labis at walang kulang na imbitasyon ni Maine sa televiewers sa guesting niya sa Sunday PinaSaya ngayong hapon.
Maine Mendoza as Emily for Jack Em Popoy The Pulis Credibles ngayon pasko na! Kasama si Coco Martin at Bossing Vic Sotto JackEmPopoy #MainedayToSundei pic.twitter.com/GunyQghYAh
— TitaEls�?�MaineTeamNoGroup (@Tita_Zer) December 9, 2018
Ang Twitter ang ginamit ng netizens na social media platform para iparating sa mga kinauukulan ang kanilang napansin na hindi pagbanggit ni Maine sa pangalan ni Coco.
Para malutas ang misteryo, isang insider ng Sunday PinaSaya ang tinanong ng Cabinet Files.
Kinumpirma niyang bawal banggitin ang pangalan ni Coco dahil hindi rin umano nababanggit sa mga programa ng ABS-CBN sina Maine at Vic, ang co-stars ng aktor sa Jack Em Popoy: The Puliscredibles.
Posibleng ikalungkot ni Coco ang isyu dahil sa presscon ng filmfest movie nila noong Huwebes, sinabi niya ang kagustuhan niyang mag-guest sa Eat Bulaga! para i-promote ang Jack Em Popoy.
“Actually, wala naman pong problema yun kasi ngayon, sabi ko nga, wala nang rival.
“Ang paggawa ng pelikula, lalo na ngayong Kapaskuhan, ginagawa po natin ito para mapaligaya yung mga Pilipino, hindi po para maglaban-laban kung sino yung magiging number one.
“Wala na pong ganoon.
“Kumbaga, gawin na lang natin ito para mapasaya yung mga tao,” ang umaasang pahayag ni Coco hanggang mangyari kanina sa Sunday PinaSaya ang hindi pagbanggit sa pangalan niya.
But in all fairness sa Eat Bulaga, araw-araw na ipinapakita sa Monday to Saturday noontime show ng GMA-7 ang teaser ng mga eksena ni Coco sa pelikula nila nina Vic at Maine.
Ang TAPE Productions ang producer ng Eat Bulaga na may blocktime deal sa GMA Network, Inc.