Kumpirmadong tulad ng kanyang girlfriend na si Sarah Geronimo, contract star na rin ng Viva Artists Agency si Matteo Guidicelli.
Marami ang nasorpresa dahil kasama si Matteo sa audi- visual presentation ng mga artista ng VAA sa "Grateful," ang thanksgiving party ng Viva para sa mga advertiser na ginanap sa Makati Shangri-La ngayong tanghali, January 31.
Matagal na contract artist si Matteo ng Star Magic, ang talent management company ng ABS-CBN hanggang magdesisyon siyang lumipat sa Viva Artists Agency.
Nagsara ang negosasyon sa pagitan ng VAA at ni Matteo noong nakaraang linggo.
Reportedly, parehong kagustuhan nina Sarah at Matteo na isang talent management agency na lang ang mamamahala sa kanilang mga career.
Ikinatuwa ng fans ng dalawa ang balita dahil umaasa silang magkakaroon ng movie projects sa Viva Films na magkasama sina Matteo at Sarah, pero malabo ang posibilidad.
Diumano, may usapan ang real-life lovers na hindi magsasama sa mga pelikula, kahit nasa iisang bakuran na sila.
