Ikagagalak ng mga tagasubaybay ni Mike Enriquez ang pagbabalik nito sa broadcast industry, tatlong buwan matapos ang kanyang medical leave.
Pansamantalang hindi napanood ang multi-awarded broadcaster sa mga programang 24 Oras at sa Imbestigador dahil sumailalim siya sa isang napakahalagang medical procedure noong December 2021.
Magbabalik na si Mike bilang host ng Imbestigador. Nakatakda siyang mag-taping bukas, March 25, 2022, para sa kanyang investigative docu-drama na napapanood tuwing Sabado sa GMA-7.
Ang mga spiel ni Mike para sa Imbestigador na hindi tatagal ng kalahating oras ang mga kukunan sa taping niyang magaganap sa GMA Network Annex building.
Matagumpay ang medical procedure kay Mike at mabilis ang paggaling niya kaya nakapunta na siya sa Cebu City noong nakaraang linggo para makiramay sa mga naulila ng kanyang kapwa broadcaster at DYSS station manager na si Bobby Nalzaro.
Si Mike ang personal na nagbigay sa pamilya ni Bobby ng parangal o posthumous award ng Radio GMA Network Inc. para sa pumanaw na broadcaster.