Nagdulot ng malawak at malalim na baha sa maraming panig ng Metro Manila at Luzon ngayong Martes, Hulyo 22, 2025, ang ilang araw na pagbuhos ng malakas na ulan.
Ito ang dahilan kaya nasuspindi ang mga klase sa paaralan, ang pasok sa ilang mga tanggapan, at kanselasyon ng taping ng mga TV show tulad ng Family Feud Philippines ng GMA-7.
Read: Ina ni Paolo Tantoco, nagsalita na tungkol sa pagkamatay ng anak
Hindi nagkulang ang mga news programs sa paghahatid ng balita tungkol sa mga lugar na sinalanta ng bagyong Crising at ng mapamerhuwisyong baha.
Napanood sa telebisyon at social media ang mga news reporter na hindi nagpatinag sa malakas na buhos ng ulan at hangin, sinugod ang baha para mag-ulat tungkol sa kalagayan ng mga apektado nating kababayan, at upang magbigay ng babala tungkol sa mga lugar na dapat iwasan.
Read: Resulta ng OPM Female Clones, inalmahan ng ibang Eat Bulaga! viewers
PAKISTANI REPORTER GOES VIRAL
Pero umaagaw ngayon ng atensiyon ng netizens ang ginawa ng Pakistani reporter na si Ali Musa Raza ng Ruhi TV.
Hindi lamang ang Pilipinas ang nakararanas ng pag-ulan at pagbaha dahil nangyari rin ito sa Pakistan at sa ibang panig ng mundo noong nakaraang linggo.
Mabilis na nag-viral ang video ni Raza habang nakalubog sa baha ang kanyang katawan at live ang pag-uulat niya tungkol sa sitwasyon sa distrito ng Sakhi Sarwar na bahagi ng rehiyon ng Koh Sulaiman, Pakistan.
Nabahala ang mga nanonood sa live report ni Raza nang maanod ito ng rumaragasang tubig baha dahil hindi na nakunan ng kamera ang mga sumunod na eksena.
Nawala lamang ang pag-aalala ng mga nanonood na baka namatay si Raza matapos malamang nagawa ng TV reporter na iligtas ang sarili mula sa pagkakaanod, na maituturing na himala.
May mga pumuri sa dedikasyon at paglilingkod na ipinamalas ni Raza bilang mamamahayag, pero tumanggap din siya ng batikos mula sa mga taong nagsabing hindi niya dapat isinugal ang buhay sa isang sitwasyong delikado na maaaring ikamatay niya.
May ilan ding nagduda kung totoo ang video na napanood nila o likha lamang ito ng AI na talamak ngayon. Ngunit pinatotohanan ng ilang news sites na authentic ang video ni Raza.
Read: Sleeping Prince ng Saudi Arabia, pumanaw na matapos ma-coma sa loob ng 20 taon