Ang Star for All Seasons na si Vilma Santos ang special guest co-host sa It’s Your Lucky Day, ang game at variety show na napapanood sa Kapamilya Channel, A2Z., at GTV, ngayong Sabado ng tanghali, Oktubre 21, 2023.
Read: 'It's Your Lucky Day' production, natutuwa sa 99% positive feedback sa programa
Naging madamdamin si Vilma pero pinigil nitong mapaluha nang sabihin niya ang mensahe para sa kanyang anak na si Luis Manzano at sa mga co-host ng noontime program.
Kasama ni Luis sa programa ngayong araw sina Jennica Garcia, Shaina Magdayao, Bianca Umali, Divine Tetay, Petite, at ang special co-host ding si Andrea Brillantes.
Wala sina Robi Domingo at Melai Cantiveros.
Pinuri ni Vilma ang mga host ng It’s Your Lucky Day dahil ayon sa kanya, hindi madaling tumanggap ng isang palabas na labindalawang araw lamang na mapapanood sa telebisyon.
Ang It’s Your Lucky Day ang pansamantalang ipinalit sa It’s Showtime, na pinatawan ng labindalawang araw na suspensiyon ng MTRCB
“I’d like to commend all of you, of course, anak at lahat-lahat kayo na It’s Your Lucky Day family,” sabi ni Vilma, na nabasag ang boses habang nagsasalita pero pinigilan ang sariling mapaiyak.
Pagpapatuloy ng aktres, “I’d like to commend them kasi sa ating mga artista, akala ninyo po ba madaling sabihin na, ‘We’re offering you pero twelve days lang na show?’
“Hindi ho madali yon. Pero itong It’s Your Lucky Day, tinanggap nila dahil hindi ho sila selfish.
"Alam ninyo kasi, twelve days, ipapasok lang sila dahil alam naman natin yung kaganapan.
"Pero selfless sila. Kasi gusto [nila] na ituloy pa rin yung entertainment at saka yung pupuwedeng suwerteng ibigay para sa mga tao.
“Imagine, when I was watching, when you made mention that 'Hindi pa nga natatapos yung initial show, last two weeks na!’
“I mean, hindi po biro yon. Actually, hindi nga kayo aabutin ng two weeks, e. Twelve days [lang].”
Ang sinabi ng aktres na labindalawang araw lamang at hindi labing-apat o dalawang linggo ang dahilan kaya nagsalita si Luis ng, “Sinampal mo naman kami ng katotohanan. Pinaganda ko na nga, e.”
Sagot ni Vilma, “Anak, twelve days lang, e.
“Pero sa totoo lang po, ipinakita nilang hindi sila makasarili. Gusto lamang nilang ituloy yung entertainment at ibigay yung mga makakatulong pa sa mga kababayan natin.
"Kaya to all of you, sa inyong pamilya po ng It’s Your Lucky Day, bow! I commend you," sabay literal na nag-bow si Vilma sa harap ni Lucky at ng kanyang co-hosts.