Mawi-withdraw na ng mga retirado ang kanilang buwanan at 13th month pensions mula sa Social Security System (SSS) simula sa Martes, December 1.
Ito ang inanunsiyo ni SSS President-Chief Executive Officer Aurora Ignacio sa isang press briefing nitong Miyerkules, November 25.
Batay sa taya ni Ignacio, at press time ay napondohan na ng SSS ang 13th month ng mga pensiyonado, na ire-release ng Development Bank of the Philippines (DBP).
“Ililipat na po namin sa DBP by today (Miyerkules) or tomorrow (Huwebes, November 26) iyong pondo para maibigay na nila sa mga bangko at maging withdrawable na siya on December 1,” sabi ni Ignacio.
Aniya, hinati sa dalawang batch ang tatanggap ng pensiyon ngayong buwan.
“So, 13th month and December pension will be on December 1, 'tapos po yung second batch ng pensioners will receive yung kanilang December pension ng December 16,” ani Ignacio.
Nitong October 2020 lang ipinatupad ng SSS ang bagong disbursement method para sa mga pensiyonado ng ahensiya.
Sa pakikipagtulungan ng DBP, inire-release na ngayon ng SSS ang buwanang pensiyon sa pamamagitan ng Philippine Electronic Fund Transfer System and Operations Network (PESONet).
Ang PESONet ay isang electronic fund transfer payments system para sa real-time na paglilipat ng pondo sa mga bangko, upang agarang matanggap ng recipient ang pera.
Maaari ring matanggap ang pensiyon sa tulong ng mga remittance transfer companies at cash payout outlets na accredited ng DBP.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika.