Magpapatupad ng uniform curfew sa buong Metro Manila simula sa Lunes, March 15.
Ngayong Huwebes ng gabi, March 11, inanunsiyo ni Metropolitan Manila Development Authority (MMDA) Chairman Benhur Abalos na lahat ng 17 local government units (LGUs) sa Metro Manila ay magpapatupad ng curfew simula 10:00 ng gabi hanggang 5:00 ng umaga.
Ginawa ni Abalos ang pahayag pagkatapos ng tatlong oras na pagpupulong ng Metro Manila Council (MMC) tungkol sa pagkakaroon ng uniform curfew.
Ang MMC ay ang policy-making body ng MMDA. Binubuo ito ng mga alkalde ng 17 LGUs sa Metro Manila.
Sa kanyang virtual press conference ngayong gabi, sinabi ni Abalos na tatagal ng dalawang linggo ang uniform curfew.
Muling nagpapatupad ng curfew dahil sa biglaang pagdami ng mga nagpopositibo sa COVID-19 sa bansa, partikular sa Metro Manila, simula March 5.
Ngayong Huwebes, nakapagtala ang Department of Health (DOH) ng 3,749 na bagong kaso ng COVID-19 infections.
Dahil dito, pumalo na sa 607,048 ang kabuuang bilang ng nagpositibo sa COVID-19 sa Pilipinas.
Sa bilang na ito, 47,769 ang kasalukuyang ginagamot, habang 12,608 na ang namatay.
“Kung bumaba naman tatanggalin agad,” ani Abalos, tinukoy ang mga naitatalang kaso ng COVID-19 sa nakalipas na mga araw.
Ayon kay Abalos, kasabay ng curfew ay nagpapatupad ng granular o isolated lockdowns ang iba’t ibang LGUs na maraming new infections na naitatala.