Inianunsyo ng Land Transportation Office (LTO) noong June 8, 2022 na ang Parañaque Integrated Terminal Exchange (PITX) ay bukas na sa publiko tuwing araw ng Sabado.
Ang bagong schedule ay sisimulan sa June 11 mula 8 a.m. hanggang 5 p.m.
Ayon sa ahensiya, maaaring mag-apply sa LTO-PITX ng non-professional driver’s license.
Bukod sa renewal at new application, tatanggapin din ang change classification at iba pang transaksiyon.
Bukas din tuwing Sabado ang iba pang supplementary services, gaya ng driving school at medical clinic. Hindi na kailangang magpa-appointment.
Dagdag pa ng ahensiya, komportable ang pagkuha ng lisensiya at iba pang serbisyo sa LTO-PITX dahil maluwag ito, maayos ang airconditioning system, maraming kainan, at may parking area kung saan din ginagawa ang actual driving exam.
Ipinaalala naman ng LTO na bago maisyuhan ng lisensiya ang isang aplikante, kailangang ito ay 17 years old o mas matanda kung Pilipino, at 18 years old pataas kung foreign nationals.
Dapat ding physically and mentally fit para mag-operate ng motor vehicle, at marunong bumasa at sumulat sa wikang Filipino at English.
Ang applicant ay dapat na mayroon nang valid student driver's permit na naisyu sa kanya nang mahigit isang buwan.
Kinakailangan ding makumpleto niya at makapasa sa Practical Driving Course, wala siyang kasong may kinalaman sa paglabag sa batas trapiko, at nakapasa sa Automated Theoretical Examination and Practical Driving Test.