Importante para sa mga magulang na iparehistro ang kanilang anak na limang taon pataas para magkaroon ng national ID.
Ito ang inihayag ng Philippine Statistics Authority (PSA) noong August 28, 2022.
Ayon kay Emily Pagador, officer-in-charge and assistant national statistician ng Use Case Development and Management Service (UCDMS) ng PSA, ang pinakaunang benepisyo para sa batang may national ID o rehistrado sa Philippine Identification System (PhilSys) ay ang smooth enrollment process kapag nag-aral na ito.
Pahayag ni Pagador, “Mas maganda po sana kung mai-register niyo na rin yung anak niyo kahit five years old pa lang siya.
“Huwag nang hintayin na 14 years old kasi di natin masasabi kung kailan nila kakailanganin yung national ID.”
Para maiparehistro ang bata, ang parents or guardians ay kailangang magdala ng mga sumusunod na requirements:
- PSA birth certificate ng bata
- school ID
- valid government ID ng parent or guardian.
Gayunpaman, kailangang i-update ang biometric information ng bata pagsapit sa edad 14.
Sinabi pa ni Pagador na ii-incorporate at ii-integrate ng PSA national ID sa mga processes and databases ng iba’t ibang ahensiya ng pamahalaan.
“Mayroon kaming mga programa na eventually i-integrate natin yung ibang systems ng gobyerno.”
Bukod aniya sa makakatulong ang national ID sa enrollment ng bata, may tiyak na agad itong hawak na valid ID na karaniwang problema ng mga Pilipino kapag may transaksiyon sa mga tanggapan ng pamahalaan at pribadong kumpanya.
Maaari rin itong gamitin ng bata sa pag-o-open ng bank account.