Natuloy ang isang linggong welga ng mga jeepney drivers sa buong bansa na sinimulan ngayong March 6, 2023.
Kung tuluy-tuloy ang transport strike, tatagal ito hanggang March 12.
Ito ay sa kabila ng desisyon ng Land Transportation Franchising and Regulatory Board’s (LTFRB) na pahabain hanggang December 31, 2023 ang deadline sa mga jeepney operators na sumali o kaya ay magbuo ng mga kooperatiba.
Ang orihinal na petsa ng deadline ng "phaseout" ay June 30.
READ ALSO: Ateneo valedictorian na anak ng jeepney driver, nag-offer ng solusyon sa jeepney strike
Gayunpaman, sa kabila ng extension ay itinuloy ng transport groups ang welga.
Anila, walang sapat na paghahanda ang pamahalaan sa pagpapatupad ng planong phaseout ng mga tradisyunal na jeepney.
Dahil dito, ilang eskuwelahan,karamihan ay sa Metro Manila, ang nagpasyang magdaos ng klase nang online.
READ ALSO: Planong phaseout ng traditional jeepneys, gustong ipagpaliban ng ilang senador
Naririto ang mga eskuwelahan na isang linggong virtual ang pagdaraos ng klase para hindi mahirapan ang mga estudyante sa pagpasok:
Assumption College San Lorenzo
Ateneo de Manila University
Cavite State University
De La Salle University (Manila campus)
Far Eastern University (Makati and Manila campuses)
La Salle Green Hills
Malayan Science
Mapua University
Polytechnic University of the Philippines
San Sebastian College – Recoletos Manila
St. Theresa's College of Quezon City
University of the East
University of the Philippines – Diliman
University of Santo Tomas
Ayon naman sa Department of Education, walang suspensiyon ng klase.
Ang mga apektadong estudyante ay papayagang maituloy ang kanilang klase sa pamamagitan ng Alternative Delivery Modes.
Sinabi ni Vice President at DepEd Secretary Sara Duterte na hindi na kakayanin ng kagawaran ang anumang pagkaantala ng mga klase nang dahil sa transport strike.
Aniya, sa kasalukuyan ay inaasikaso pa ng DepEd ang pagsasaayos ng learning recovery program kasunod ng malaking naging epekto ng pandemya sa basic education sector ng bansa.