Ipinagbabawal na, for health reasons, ang pagbebenta ng pre-packed at processed food products na nagtataglay ng trans fat.
Ang trans fat ay ginagawang sangkap sa maraming food products para tumagal ang shelf life nila. Pero ang downside, itinuturing itong "worst" fat at iniuugnay sa diabetes at cardio-vascular diseases o sakit sa puso.
Bukod sa pre-packed at processed food, mataas din sa trans fat ang fried food at ibang baked products, tulad ng donuts, cookies, biscuits, crackers, tinapay na may margarine, pati chichirya.
Ayon sa ulat ng GMA News, ang batas ay alinsunod sa Food and Drug Administration Memorandum Circular 2021-0039 na siyang nagpapatupad ng Food Safety Act.
Ang mga kumpanya at establishments na hindi susunod ay maaaring bawian ng certificate of product registration at mapatawan ng multa o parusa ng FDA.
Sa ulat ng World Health Organization (WHO) tinatayang 540,000 ang namamatay taun-taon dahil sa heart disease bunsod ng trans-fatty-acids intake.
Sa Pilipinas, coronary disease ang nangungunang dahilan ng pagkamatay ng maraming Pinoy.
Ayon kay Attorney Sophia San Luis, executive director ng ImagineLaw, inilunsad ang Bantay Kontra Trans Fat Network na magsisilbing citizens arm na magmo-monitor kung sumusunod ang food manufacturers sa utos, at magbibigay-kaalaman sa mga Pinoy ukol sa panganib ng trans fat.
Sang-ayon naman si Health Secretary Ted Herbosa sa batas, pero ang FDA raw dapat ang magpatupad ng batas.
Ang malaking hamon kasi ay ang pag-educate sa publiko ukol sa masamang epekto ng trans fat.
Maaari naman daw gumamit ang food manufacturers ng alternative food grade oil, tulad ng canola oil at sunflower oil, sa kanilang produkto.
WHAT IS TRANS FAT?
Ayon sa WHO ang trans fat o trans-fatty acids “are unsaturated fatty acids that come from either natural or industrial sources."
Ang “naturally-occurring trans fat" ay galing sa "ruminants (cows and sheep)."
Ang “industrially-produced trans fat" ay mula sa "industrial process that adds hydrogen to vegetable oil converting the liquid into a solid, resulting in 'partially hydrogenated' oil (PHO).”
Nagiging solido ang PHO sa room temperature kaya tumatagal ang shelf life ng food products.
Ginagamit ang PHO sa deep frying at ingredient din sa baked goods.
Gaano ba karami ang trans fat na puwedeng maging intake?
Sabi sa WHO website: “International expert groups and public health authorities recommend limiting consumption of trans fat (industrially-produced and ruminant) to less than 1% of total energy intake, which translates to less than 2.2 g/day for a 2,000-calorie diet."
Reminder naman ng mga doktor sa mga mamimili, suriing mabuti ang label para matiyak na hindi mataas sa trans fat ang produktong binibili.