Sa panahon ngayon, ang smartphone ay karugtong na ng ating buhay at maituturing na bahagi na ng ating pamumuhay.
Kahit nga sa loob ng bus o tren o anumang sasakyan, makikitang nakayuko ang karamihan, at nakatingin sa smartphone.
Puwede na kasing manood dito ng paboritong series, movies, at videos; maglaro ng mobile games; makinig ng music—sa radio station man o streaming services.
At sa ganitong sitwasyon, para tayong nasa sarili na nating mundo—walang pakialam sa paligid kesehodang nasa public transportation at nakakabulahaw sa ating mga katabi.
Dito pumapasok ang importansiya ng pagkakaroon ng headphones—o earphones—kapag gagamit ng smartphone sa public transportation.
Read: Australia to ban social media for children under 16
LOUD SMARTPHONE IRRITATES LIKE CIGARETTE SMOKE OR VAPE
Para kay Emmanuel Camara, isang psychology graduate na naging English teacher sa Vietnam at ngayon ay contributor sa isang local newspaper sa Calabarzon, ang panonood ng videos, pakikinig ng music, at paglalaro ng video games sa smartphone nang walang headphones kapag sakay ng public transportation ay maihahalintulad sa paninigarilyo o pagbi-vape sa kulumpon ng maraming tao.
Aniya, “Polusyon iyan sa tainga lalo na kung hindi mo gusto yung sound na naririnig mo mula sa smartphone ng iba.
“Yung pakiramdam mo na nakasinghot ka ng usok mula sa sigarilyo o vape lalo na kung hate mo ang ganitong amoy, ganun din ang feeling.
"Maiirita ka sa sound na naririnig mo na ayaw ng iyong sistema.”
Aniya, kawalan daw ng konsiderasyon ito sa pakiramdam ng ibang mga pasahero.
“Nag-iba na kasi ang ating paraan ng pakikipagkapwa-tao sa paglipas ng panahon. Nabago na ang ating values.
"Hindi na gaya ng dati na iniisip pa natin kung nakakaperhuwisyo tayo sa iba, ngayon ay hindi na.”
Read: LRT-1 Cavite extension Phase 1 operations to start this November
THE NOISY PARROT
Naoobserbahan mismo ni Emmanuel ang ganitong sitwasyon kapag sakay siya ng bus mula Quezon papuntang Metro Manila o vice versa.
“May nakatabi akong ale sa upuan. Sa hindi ko malamang dahilan, tuwang-tuwa siya pakikinig sa video ng lorong sumisigaw. Paulit-ulit niyang ipine-play yung video.”
Dahil nahihiya siyang sawayin ang ale, tiniis na lang ni Emmanuel ang ilang oras ng biyahe na umuukilkil sa tainga niya ang sound ng screaming parrot.
“Ang resulta, pagbaba ko ng bus ay may migraine na ako.
“Nag-attend ako nun ng seminar tungkol sa pagtatayo ng kooperatiba, wala akong naunawaan dahil sa sakit ng ulo ko.
“Parang nakatanim na sa isip ko yung sound na pinakikinggan ng ale.”
Aniya, kung may headphones ang ale, hindi sana siya nag-suffer.
“Maraming naka-smartphone tayong nakakasakay, pero yung iba ay hindi naman pinalalakas ang volume o kaya ay gumagamit ng headphones, okey yun.
“Ang hindi okey, yung walang headphones, tapos ang lakas-lakas pa.”
Read: No one wants to run as mayor in this old town
THE NEIGHBORHOOD VIDEOKE
Binanggit ding halimbawa ni Emmanuel ang napakalakas na pagbi-videoke ng mga kapitbahay lalo na kung weekend.
“Walang humpay ang kantahan kahit pa mga sintunado mula umaga hanggang hapon.
“Yung mga nagbi-videoke, hindi nila naiisip na yung kapitbahay nila, baka gustong magpahinga at ma-relax ang isip at katawan sa limang araw na pagtatrabaho.
“Wala sa kanila yun dahil pansariling kasiyahan lang ang iniisip nila. Ganun din yung mga malalakas magpatunog ng smartphone nila sa public transportation nang hindi gumagamit ng headphones.”
Read: "Fart kontrol” signboard in Sweden goes viral
THE NOISE POLLUTION INSIDE JEEPNEY
Ibinahagi naman ni Daniel, isang information technology staff sa PEP.ph (Philippine Entertainment Portal), ang karanasan sa maingay magpatunog ng smartphone sa public transportation.
Kuwento ni Daniel, lagi niyang nakakasakay sa modern jeepney ang isang lalaki tuwing umaga kapag papasok na siya sa trabaho.
“Sumasakay pa lang siya malakas na agad ang sound ng smartphone niya. Hindi rin siya gumagamit ng headphones.”
Sa obserbasyon niya, nagmula ang lalaki sa isang probinsiya, at ang pinapanood nito ay videos ay gamit ang kanilang dialect.
“Bukod sa maingay, hindi mo pa nauunawaan kaya masakit sa tainga.
“Aminin na natin, kahit pa high-end na smartphone, hindi kagandahan ang tunog niyan lalo kung hindi ka interesado sa sound na naririnig mo. Nakakairita.”
Dagdag pa niya, “Kalimitan kasi sa mga modern jeepney, may sound system iyan, naka-tune in sa FM station.
“Yung nakakasakay ko, nakikipagpaligsahan pa sa lakas ng volume ng radyo ng jeepney kaya halu-halo ang tunog—na nakaka-bad trip lalo na kung siksikan.
“At hindi lang siya ang walang headphones na naka-volume up ang smartphone, ilan sila. Siya nga lang yung pinakamalakas.”
Read: Two co-branded credit cards offer high rewards, cashbacks
Para aniyang tukso ng pagkakataon, lagi niyang nakakasakay ang lalaki.
“Hindi ko siya maiwasan kasi una akong sumasakay kaysa sa kanya.
“Minsan, hindi agad ako sumakay sa jeep na nasa pila para hindi ko siya makasakay.
"Kaso, pagdaan namin sa lugar niya, saka pa lang din siya nag-aabang.
“Nakakasira ng araw.”
Aminado si Daniel na gusto niya ng tahimik na biyahe lalo na pag umaga.
“Siyempre, nagmuni-muni ka. Gusto mong lumilipad ang isip mo, walang stress at chill lang.”
Dumating sa point na gusto na niyang komprontahin ang lalaki.
“Yung makita ko pa lang siyang pasakay, bad trip na ako. Tapos ako pa yung unang bumababa.”
Para masolusyunan ang kanyang problema, siya na ang nag-adjust.
“Ayoko talagang gumamit ng smartphone kapag nasa biyahe, pero napilitan akong bumili ng noise cancelling headphones.
“Every time na kasakay ko yung lalaki, ginagamit ko para hindi ko naririnig ang kanyang ingay.”
Read: Meet Sokusekisai Oyama, “Japan’s Instant Noodle King”
INFO DRIVE ON USE OF SMARTPHONES IN PUBLIC TRANSPORT
Para kay Emmanuel, dapat may legislation na nagtatakda sa paggamit ng headphones sa smartphone kapag nasa public transportation.
“Siguro information drive muna. Sana may gumawa ng social media page na naka-dedicate sa tamang etiquette sa paggamit ng smartphone kung nasa pampublikong sasakyan.
“Kung makikita ito ng ibang hindi aware na nakakairita sila sa mga kapasahero, baka kahit paano ay makaapekto sa kanila.
“Yung mga sasakyan, dapat din na may sign na parang yung no smoking sign. Ipaalala sa mga pasahero na mag-headphone sa paggamit ng smartphone.”
Aniya, siguradong may magpo-post ng videos ng mga malakas magpatunog ng smartphone sa public transportation kaya mag-aalanganin na ang iba.
“Unless makapal lang talaga ang mukha o sadyang walang urbanidad at kurtesiya sa kapwa.”
Sabi pa ni Emmanuel, marami namang headphones na affordable. Ang ibang smartphone ay may kasama rin kapag binili.
“Why not invest? Para solo mo ang enjoyment mo sa anumang pinapanood, pinakikinggan, at nilalaro mo. Hindi ka pa nakakaperhuwisyo ng kapwa mo pasahero.”