May karapatan kang sabihan ang content creators na i-blur ang mukha mo kung nahagip ka sa kanilang videos na ipino-post nila sa social media.
Puwede mo actually itong ipatanggal lalo na kung wala kang pahintulot.
Ito ang impormasyong ibinahagi ng National Privacy Commission (NPC) sa inilabas nitong NPC Circular No. 2025-01 na may titulong, “Guidelines on the processing of personal data collected using body-worn cameras.”
Sakop ng sirkular ang police officers, private security agencies, at maging vloggers, na inilarawan as "someone who makes video blogs or vlogs (recording of thoughts, ideas, or opinions on a subject) and posts them on the internet.”
Hangad nitong ma-establish ang protocols para sa proteksiyon ng impormasyon ng subjects at ng kanilang data privacy rights.
Read: “No One Passed”: Netizens react to Special Board Exam results
NPC ON GUIDELINES FOR VLOGGERS
Nilinaw ng NPC na hindi bawal ang pagba-vlog, pero kailangang alam ng mga vloggers o content creators ang kanilang limitasyon.
“Dapat po sinusunod niyo ang basic principles, o general principles of privacy, o ang transparency, legitimate purpose, proportionality, lawfulness, and fairness,” saad ni Atty. Aubin Arn Nieva, NPC Data Security and Compliance Office director, sa ulat ng Bagong Pilipinas ng PTV nitong July 16, 2025.
Paalala pa ni Nieva: “Isa pa pong importante dito ay dapat ang vlogger, inaatasan po ng sirkular na ito, na gumamit ng technolohiya na masking.
"I-mask niyo po, i-blur niyo po ang mga mukha, lalo na ang mga bata, at mga miyembro ng society na vulnerable, kagaya ng elderly and PWDs.”
Dapat ring nakuha ng vlogger ang pahintulot ng sinumang itatampok sa video na ipo-post ito sa social media.
Otherwise, mayroon silang “right to object, right to erasure, take down of posts, among others.”
Responsibilidad din ng vlogger na tiyaking ligtas ang impormasyon tungkol sa kanyang subject.
Kapag hindi tumugon sa guidelines ang vlogger, may karapatan ang subject na magsampa ng administrative, civil, at criminal case.
Ito ay alinsunod sa provisions ng Data Privacy Act, sa implementing rules and regulations, at related issuances ng NPC.
Maaaring makipag-ugnayan ang publiko sa NPC sa complaints@privacy.gov.ph.
Pinaalalahanan din ni Nieva ang mga vloggers, na kumikita sa kanilang vlogs, na magpa-register sa NPC.
Ang mga hindi sumunod ay maaaring patawan ng show cause order at magmulta ng PHP50,000.
Maaaring magparehistro ang vloggers sa NPC office o kaya ay sa online portal ng National Privacy Commission Registration System.
Read: Impostor flight attendant racks up more than 120 free flights