Ang magkaroon ng all-in-one app—mula sa pag-aaral, training, hanggang sa makahanap ng trabaho—ang goal ng Skills Passport app ng Technical Education and Skills Development Authority (TESDA).
Inilunsad ito nitong Huwebes, February 5, 2026.
Ang Skills Passport app ay “mobile-first, digital solution designed to streamline training, certifications, employment, and scholarship services for Filipinos,” ayon sa TESDA website.
Layon nitong gawing moderno ang Technical-Vocational Education and Training (TVET).
Magiging mas madali rin ang access ng mga manggagawang Pilipino sa mas pinalawak na scholarships at skills trainings.
Parte ito ng mga programang pinondohan ng PHP20-billion budget, pinakamalaking allotment na nakuha ng ahensiya sa kasaysayan nito.
Ang launching noong Huwebes ay pinangunahan nina Pangulong Bongbong Marcos at TESDA Director at Secretary General Kiko Benitez.
Sabi ng kalihim, “[D]ahil sa TESDA Skills Passport, mas malakas na ang sistema natin na magbibigay at magve-verify ng trainings at certifications.”
Sa tulong ng tinawag niyang “super app,” mas magiging visible sa isang user ang trainings at job opportunities.
Paliwanag pa ni Benitez sa hiwalay na panayam: “Ito pong ating ‘training to trabaho’ na app na Skills Passport ay isa po sa ating best practices sa Philippines, kunsaan po tinutuhog natin ang mga training, micro-credential badges...
"Gumagawa po tayo ng digital resume at gumagawa po tayo ng alignment with DepEd and CHED para maging mas malinaw po kung saan, anong level ng ating mga training, at anong klaseng trabaho po ang makukuha natin pagkatapos.”
SKILLS PASSPORT FEATURES
Ang app ay nagsisilbing digital identity at portfolio—o resume—ng user.
Masi-save, masi-secure, at mama-manage niya rito ang kanyang credentials at skills.
Madi-display rin nito ang verified digital record ng TESDA National Certificates at ng completed trainings.
Ito ay QR-enabled kaya mas madali i-share sa potential employers.
Inisa-isa rin sa TESDA website ang pangunahing features ng app.
Job Opportunities
Nagsisilbing “job hub” ang app na may listahan ng mga trabaho mula sa partners na job sites.
May feature din itong Find a TESDAn, upang makagawa ang TESDA graduates ng worker profiles, at ma-match sila sa mga trabaho batay sa kanilang location, industry, at desired salary.
Learning Paths
Makikita rito ang TESDA Online Program (TOP), kunsaan nakalista ang free courses, at makakatanggap ang users ng personalized recommendations batay sa kanilang skills at career goals.
Scholarships
Magbibigay ito ng real-time access sa TESDA scholarship programs na naka-synchronize sa Biometric-enabled Scholarship Registration System (BSRS).
Sa pamamagitan nito, magagawa ng users na makita ang scholarships na filtered batay sa location at qualifications.
Magagawa ring ma-track ang application status gamit ang app.
Centers Near Me
May map-based locator ito para madaling makahanap ng TESDA-accredited training, assessment, at technology institutions sa buong bansa.
Ang TESDA Skills Passport ay maaari nang ma-download sa Android at iOS devices.
Read: How Philippine Red Cross Safe Card can help during an emergency