Extended ang bisa ng mga expired driver’s license at iba pang transportation licenses hanggang July 31, 2026, subalit may parusa ang mga hindi makakapag-renew pagkalipas ng deadline.
Ito ang announcement na ginawa ng Land Transportation Office (LTO) sa Facebook page nito noong June 19, 2026.
Ikinatuwa ito ng mga motoristang may pasong lisensiya.
Bukod sa driver’s license, extended din ang validity ng conductor’s license, student driver’s permit, at rehistro ng sasakyan.
Ang hindi pagpataw ng penalty o multa sa expired licenses hanggang sa end of July ay dahil sa bisa ng Memorandum Circular No. MVL-2026-5157.
Pero babala ng LTO: “Pagkatapos ng nasabing petsa, ang mga expired na lisensya, permit, at rehistro ng sasakyan na hindi pa nare-renew ay sasailalim na sa umiiral na mga patakaran at kaukulang multa para sa late renewal.”
Kaugnay nito, nagpaalala ng LTO sa mga motorista at vehicle owners na mag-renew bago ang deadline para hindi maabala at mapatawan ng penalty.
Read: Pinoy travelers to Japan exempted from visa fee increase--embassy
HOW TO RENEW LICENSE ONLINE
Kaugnay nito, puwedeng nang i-renew ang driver’s license ng mga motorista online.
Iwas ito sa hassle ng biyahe at mga pila.
Ang eGovPH Online Driver’s License Renewal System ay inilunsad noong nakaraang taon.
Narito ang steps upang makapag-renew.
Bago magsimula, i-download ang eGovPH mula sa App Store, Google Play, o Huawei AppGallery.
Kasunod nito ay gumawa ng account. Kakailanganin dito ang iyong basic information, pag-upload ng selfie para sa verification, at pag-set up ng MPIN.
Pre-renewal requirements:
Bago pa man simulan ang pag-a-apply ng renewal license online, unahin nang kunin ang mga requirements: online medical examination at Online Driver’s Enhancement Program o ODEP.
Hindi na kailangan bumisita sa clinic dahil posible ito via Telemedicine LTO service sa eGovPH app.
Narito ang steps para sa online medical exam:
- Pagpunta sa LTO service, hanapin ang medical certificate section at i-tap ang “Click here” para ma-access ng Telemedicine page.
- Pumili ng clinic, mag-register, at i-book ang preferred schedule para sa teleconsult.
- I-fill out ang medical history form at bayaran ang fee.
- Sa mismong teleconsult, ang doctor ay magsasagawa ng remote checkup, kabilang ang Snellen eye test at color blindness test. Lahat ito ay via online.
- Matapos ang consultation, makakatanggap ng medical certificate na kakailangan mong i-upload para sa license renewal.
Ang validity ng certificate na ito ay 15 days mula sa issuance date.
Isa pang kakailangan ay ang ODEP, na mayroong full program online—video modules at interactive content.
Kabilang sa topics na tatalakayin sa ODEP seminar ay road safety guidelines, traffic laws, at driver responsibilities.
Heto naman ang steps para sa ODEP.
- I-tap ang “Click here” sa ODEP Certificate section at piliin ang “Open” sa ilalim ng Safe Roads PH.
- Makikita ang listahan ng online driving schools at pumili ng isa, mag-sign up, mag-upload ng iyong photo, at bayaran ang fee.
- Kunin at tapusin ang five-hour online course.
- Kapag nakapasa, makakakuha ng ODEP Certificate para sa license renewal.
ONLINE DRIVER'S LICENSE RENEWAL
Kapag nakumpleto na ang mga ito, simulan na ang online driver’s license renewal process.
- Pumunta sa main dashboard ng eGovPH app at i-tap ang “NGA” o National Government Agencies. Piliin ang LTO, isunod ang “Online Driver’s License Application” at pagkatapos ay ang “Renew Your Driver’s License.”
- Isumite ang required pre-steps: ang certificates ng Telemedicine Medical Exam at ang ODEP.
- Isunod na i-upload ang iyong license. Tiyaking malinaw ang kuha ng larawan sa iyong current driver’s license.
- Ibe-verify ng app ang photos sa loob ng isa hanggang tatlong minuto.
- I-submit ang iyong selfie photo. Sundin lamang ang instructions sa pagkuha ng iyong selfie para sa identity verification.
- I-review ang mga detalye at mga uploaded documents. Tiyaking tama ang mga ito at i-click ang “Submit.”
- Magbayad online. Puwedeng gawin ang payment via e-wallet, credit/bank card, o bank. Bayaran ang renewal fee at anumang service fee. Ang base renewal cost ay tinatayang PHP585 hanggang PHP820. Pero maaaring mag-iba-iba ang fee depende sa validity, courier delivery, at penalties.
- Matapos ang approval, ang iyong digital license—tinatawag ding electronic driver’s license—ay automatic na lalabas sa eGovPH app at puwedeng gamitin bilang valid legal ID.
Puwede ring kunin ang physical card sa LTO office o piliing mai-deliver ito sa iyo sa loob ng tatlong araw.
Sa report ng GMA News binanggit na kinakailangang bayaran muna ng mga may huli ang multa at kailangan ng personal appearance sa LTO office ang first-time applicants ng driver’s license.