Puwede pa ring ma-avail ng mga senior citizens ang kanilang pribilehiyo, pati na rin discounts, kahit na nakalimutan o hindi nila nadala ang kanilang ID.
Ito ang binigyang-linaw ni Akbayan Partylist Representative Atty. Chel Diokno sa video na in-upload sa kanyang social media accounts.
Mula ito sa kanyang pahayag sa grupo ng senior citizens sa Camarines Norte noong October 24, 2026.
“Puwede pa ring magpa-discount kahit hindi niyo dala ang inyong senior ID. Kahit anong valid government ID, ipapakita niyo lang iyan, dapat irespeto nila,” diin ni Atty. Diokno.
Kung sakali mang sabihin ng establishment na hindi tatanggapin ang valid government ID, ipalaam daw sa establishment na nasa batas ito, at ang sinumang lalabag ay may kaukulang parusa.
Ang tinutukoy na batas ni Atty. Diokno ay ang Republic Act 9994 o Expanded Senior Citizens Act of 2010.
Sa Section 4, nakasaad dito ang mga pagkakakilanlan o IDs pa puwedeng dalhin ng senior citizen.
- Ang senior citizen ID na inisyu ng Office of the Senior Citizen Affairs (OSCA);
- Passport ng senior citizen;
- Anumang dokumento na nagpapatunay na ang senior citizen ay Pilipino at 60-anyos.
Binanggit din sa batas ang parusa sa anumang paglabag sa RA 9994, specifically sa hindi pagkilala sa mga senior citizens.
Para sa unang violation, may mulang PHP50,000-PHP100,000 at pagkakakulong na dalawa hanggang anim na taon.
Sa susunod na violation, may multang PHP100,000-PHP200,000 at kulong na dalawang taon hanggang anim na taon.
Read: Seniors no longer need purchase booklets in drugstores
SENIOR CITIZEN PURCHASE BOOKLET
Ayon pa kay Atty. Diokno, hindi na kailangan ng senior citizen purchase booklet para makapag-avail ng discounts sa botika ang seniors.
Pero kailangan ito sa groceries, LPG, at iba pang produkto at serbisyo.
Binanggit din ni Atty. Diokno na ang senior citizens ay may five-percent discount sa LPG.
Kapag may hinaing o concern pagdating sa senior citizen ID, dumulog sa OSCA; para sa booklet, dumulog naman sa Department of Health.