NOEL FERRER: Nag-food tasting ang Angrydobo restaurant nina Judy Ann Santos at Ryan Agoncillo nitong Abril 24, Miyerkules, sa Taft Avenue, Manila, sa tapat ng De La Salle University.
Appetizer choices ang angrydobo nachos fully loaded at cheesy sweet potato fries.
Ang major meal ay may 4 choices: angrydobo classic (pork belly), shortribs, chicken, sardines with egg.
Lahat ng ito ay may basic angrydobo sauce na signature concoction ni Chef Juday.
Ang dessert ay choice ng dark or white chocolate champsicle (champorado popsicle) na napakasarap.
Imbes na kumuha ng franchise at maghintay ng puwesto sa food courts at foodparks, heto at magtatayo na sila ng masasabi nilang kanila talaga!
Kasama sa foodtasting ang mentor nilang dalawa na si Chef Gene Gonzalez na nagbigay ng seal of approval at blessing sa bagong business ng mag-asawa.
To Juday and Ryan who are celebrating their 10th wedding anniversary on Sunday, salamat sa patuloy na inspirasyon at pagmamahal!
JERRY OLEA: Sa Mayo inaasahang magbukas ang nasabing restaurant ng mag-asawa.
Reasonably priced ang combo meal, na target ang mga estudyante.
Mahigpit ang competition dahil andami nilang kalaban na ansasarap din ng mga pagkain.
Hopefully ay suwertehin ang puwesto nina Juday at Ryan.
GORGY RULA: Itong Angrydobo na yata ang bagong baby ng mag-asawa, ano?
Nabanggit kasi noon ni Judy Ann na happy na sila sa tatlong anak. Pero kung mabiyayaan sila ng isa pa, okay pa rin daw.
At least, may pinagkakaabalahan si Juday dahil hindi pa niya inaasahang matuluy-tuloy ang taping niya sa Starla.
Totoo bang habang may FPJ’s Ang Probinsyano, nakatengga muna si Starla?