JERRY OLEA: Umaatikabong aksiyon ang hatid ng John Wick Chapter 3 Parabellum, at wagi ito sa takilya ng Pilipinas nang mag-open noong Mayo 15.
Nitong Mayo 22, Miyerkules, ay Aladdin naman ang nag-open sa theaters ng lupang hinirang, kasabay ang pelikula ni John Estrada na The Last Interview: The Mayor Antonio Halili Story.
Harinawang showing pa rin ang “Last” movie ni John at hindi nag-first day, last day sa mga sinehan.
Sa Mayo 29, mag-o-open sa mga sinehan ang Quezon’s Game (Raymond Bagatsing & Rachel Alejandro), Finding You (Jerome Ponce, Jane Oineza & Barbie Imperial), at Banal (Bianca Umali, Miguel Tanfelix & Andrea Brillantes).
Makakasagupa nila ang Godzilla II: King of the Monsters.
Tatlong halimaw ang katunggali rito ni Godzilla—sina Mothra, Rodan, at King Ghidorah.
Kapana-panabik kung paano pababagsakin ni Godzilla ang mga kalaban.
NOEL FERRER: Base sa theater owners at bookers, P20.7M ang first day gross ng Aladdin.
Itong The Last Interview: The Mayor Antonio Halili Story ay walang significant record sa theater owners sa sobrang baba noong unang araw.
Nakakaawa ang pelikulang Pilipino!
GORGY RULA: Parang kapos sa promo ang mga pelikulang ito.
Sana may suwertehin kahit isa sa mga pelikulang iyan.
Ito kasing Mayor Antonio Halili Story, nanganganib nang matanggalan ng mga sinehan.