JERRY OLEA: Mahigit 100 bituin ang inaasahang magpapaningning sa 35th PMPC Star Awards for Movies bukas, Hunyo 2, Linggo ng gabi, sa Newport Performing Arts Theater ng Resorts World Manila.
Dalawa ang Lifetime Achievement awardees—sina Dante Rivero at Laurice Guillen.
Apat ang kikilalanin bilang Outstanding Pillars of PMPC—sina Ethel Ramos, Ronald Constantino, Letty Celi, at Veronica Samio.
Anim ang hosts—sina Kathryn Bernardo, Iza Calzado, Gelli de Belen, Arci Muñoz, Aljur Abrenica, at Robi Domingo.
Isang dosena ang pagpupugayan bilang Mga Natatanging Bituin Ng Siglo—sina Nora Aunor, Tirso Cruz III, Christopher de Leon, Joseph Estrada, Eddie Garcia, Anita Linda, Niño Muhlach, Ramon Revilla Sr., Susan Roces, Gloria Romero, Phillip Salvador, at Vilma Santos.
Sa tatlong production numbers ay 18 ang artista—Martin Nievera, Darren Espanto, Sam Concepcion, Ylona Garcia, Klarisse de Guzman, Maja Salvador, Heaven Peralejo, AC Bonifacio, Kira Balinger, Belle Mariano, Jameson Blake, Zeus Collins, Grae Fernandez, Fumiya, Yam Yam, Julian Trono , Lance Carr, at Marco Gallo.
Kasama sa hatawan ang Hotlegs at PHD Dancers.
Sampung love teams ang magtatagisan—Angelica Panganiban & Carlo Aquino, Barbie Forteza & Derrick Monasterio, Coco Martin & Maine Mendoza, Donny Pangilinan & Kisses Delavin, Gerald Anderson & Pia Wurtzbach, Kathryn Bernardo and Daniel Padilla, James Reid and Nadine Lustre, Joshua Garcia & Julia Barretto, Maymay Entrata & Edward Barber, at Nash Aguas & Sharlene San Pedro.
Animnapu’t pito (67) ang acting nominees—10 sa kategoryang best actor, 10 sa best actress, 10 sa best supporting actor, 10 sa best supporting actress, 10 sa best new movie actor, 10 sa best new movie actress, at 7 sa best child performer.
Andiyan pa ang nominees sa Darling of the Press, at ang presenters sa napakaraming kategorya.
Kaugnay ang 35th PMPC Star Awards for Movies sa pagdiriwang ng 100 Years of Philippine Cinema. Ite-telecast ito sa Sunday’s Best ng ABS-CBN sa Hunyo 16.
NOEL FERRER: Dahil 100 Years ng Philippine Cinema, parehong may tribute to Icons ang Star Awards at Eddys para rin assured sa star value ang awards presentations nila.
Kailangan ito para mas palatable sa advertisers at sponsors ang ganitong event—lalo pa yung may TV coverage.
Good luck sa mga awards nights na darating at sa mga kaibigan nating nagtataguyod nito.
Sana lang, sa dami ng awards, dumami rin ang mga pelikulang Pilipino na kumita sa box office. Sana.
GORGY RULA: Ang PMPC lang ang makaka-gather ng ganoon karaming artista. Kaya madali siyang ibenta at hanapan ng sponsors, at kaagad naipapalabas sa ABS-CBN.
Ngayong araw pa lang ang botohan nila at deliberation, pero bakit parang may nararamdaman akong isa sa hosts ang magwawagi?
Ramdam ko ring may magta-tie na hindi bago sa award-giving bodies dito sa atin.
Kaya i-enjoy natin ang stars & starlets na eeksena bukas sa Resorts World Manila.