GORGY RULA
Ngayong nagsisimula nang mag-promote si Super Tekla para sa launching movie niyang Kiko en Lala, itinanong namin sa kanya kung posible siyang mag-promote sa Wowowin ni Willie Revillame.
Parang naiyak si Super Tekla nang napag-usapan namin ang tungkol kay Willie.
Iyon sana ang isa sa matagal na niyang hiling—na i-endorse ni Willie ang pelikua niya.
“Isang malaking factor si Kuya Wil, na babasbasan yung movie ko.
“Wala na siguro akong ano… parang half of my kaba, mawawala,” pakli ni Super Tekla sa mediacon ng Kiko en Lala nitong Setyembre 17, Martes, sa GMA-7.
Balak niyang sadyain si Willie para personal niyang makausap.
“Naghahanap lang ako ng tiyempo. Once na makatiyempo ako, di ako magdadalawang-isip.
“Kung mabibigyan ako ng pagkakataon, bakit hindi?” sabi pa niya.
“Alam nating lahat na yung malaking bahagi ng aking karera ay sa Wowowin.
"Kung ano man ang narating ko ngayon… kung walang Kuya Wil na nagbugbog sa akin para maging Tekla, wala ako ngayon.
“I’m looking forward talaga and praying na sana, ma-touch si Kuya na kung puwede lang,” dagdag niyang pahayag.
Kaya ang mensahe niya para kay Willie, “Kuya, baka naman?
"Sana mabasbasan man lang niya ako, malaking utang na loob ko talaga yun.
“Pakiramdam ko naman. Si Kuya, madali lang suyuin 'yan, e.
"Kailangan lang ng timing talaga, kasi alam mo na hindi natin ano yung sitwasyon.
"Dapat, perfect lang yung timing."
Sa September 25 na ang showing ng Kiko en Lala.
Kaya dapat makausap na niya si Willie agad-agad para mabigyan na siya ng schedule ng guesting.
Titiyakin daw niyang hindi siya mali-late kung papayagan siyang mag-promote sa Wowowin.
NOEL FERRER
Makakatulong of course ang endorsement ni Willie Revillame sa pelikulang ito ni Super Tekla... pero hindi sapat yun!
Sana, maayos ang pelikula.
Yun ang pinakamaganda at pinakaepektibong endorsement.
JERRY OLEA
Salamat at mahuhusgahan na ang launching film ni Super Tekla, na iprinodyus ng Backyard Productions.
Noong Mayo pa ang original playdate nito, at ito sana ang comeback ng GMA Pictures (dating GMA Films).
Ang naging buena mano ng GMA Pictures ay Family History nina Dawn Zulueta.
Sa ilalim na ng Backyard itong Kiko en Lala.
Ito bang Backyard ang katumbas ng Black Sheep sa ABS-CBN?
Tampok din sa Kiko en Lala si Ai-Ai de las (bida sa kapapalabas na And Ai Thank You), at si Derrick Monasterio (leading man sa Wild & Free, na nasa Netflix na).
Makakasalpukan nito sa takilya ang #Jowable nina Kim Molina (bida sa digital movie na Momol Nights katambal si Kit Thompson) at Jerald Napoles (bida sa Mina-anud kasama si Dennis Trillo).