JERRY OLEA
Verdict is out.
Ligwak ang Pilipinas sa shortlist ng kategoryang International Feature Film (dating Foreign Language Film) ng Oscars 2020.
Ang sampung pasok sa banga ng shortlist—in alphabetical order by country—ay ang mga sumusunod:
Czech Republic, The Painted Bird
Estonia, Truth and Justice
France, Les Misérables
Hungary, Those Who Remained
North Macedonia, Honeyland
Poland, Corpus Christi
Russia, Beanpole
Senegal, Atlantics
South Korea, Parasite
Spain, Pain and Glory
Parasite, South Korea
Ninety-one (91) films ang eligible sa kategoryang ito, kung saan ang isinumite ng Pilipinas ay ang pelikulang Verdict na tinampukan nina Max Eigenmann at Kristoffer King, sa direksiyon ni Raymond Ribay Gutierrez.
Ito ang ika-31 aspiring entry ng Pilipinas sa Oscars.
Ang nominations para sa 92nd Oscars o Academy Awards ay ihahayag sa Enero 13, 2020 ng umaga.
Ang awards night ay nakatakda sa Pebrero 9, 2020, Linggo, sa Dolby Theatre, Hollywood & Highland Center, Hollywood, California.
Ite-televise ito nang live sa ABC Television Network, maging sa mahigit 225 bansa at teritoryo.
NOEL FERRER
The Verdict is Out na talaga! Paano na kaya tayo magiging In?!
Magandang i-project ito ng ating bagong Film Academy of the Philippines (FAP) Director-General Vivian Velez na talagang maghanap at sumuporta para makapag-produce tayo ng pelikulang Oscar-worthy.
Malaking suporta ang kailangan mula sa gobyerno para mapagtagumpayan ito.
Sana, ito ang isa sa mga bagay na magbubuklod sa FAP at Film Development Council of the Philippines (FDCP) ni Chair Liza Diño.
GORGY RULA
Noong nakaraang Abril lamang ginawang International Feature Film ang pangalan ng kategoryang Foreign Language Film sa Oscars.
Paano kamo napili ang mga na-shortlist sa naturang kategorya?
Inanyayahan ang Academy members sa lahat ng sangay para mag-participate sa preliminary round. Kailangang napanood nila ang submitted films sa sinehan.
May minimum viewing requirement upang maging eligible na bumoto sa kategorya.
Pito ang choices ng Academy members. Idinagdag doon ang tatlong selections na pinagbotohan ng International Feature Film Award Executive Committee ng Academy.
Ang most recent winner sa kategoryang ito ay ang Roma ng bansang Mexico.
Idinirek ito ni Alfonso Cuaron, at streaming pa rin sa Netflix.