GORGY RULA:
Kahit nag-iiyak si Rabiya Mateo pagkatapos ng National Costume competition, masaya niyang ibinahagi sa mga fans na masaya at satisfied siya sa ginawa niya sa close-door interview kasama ang walong hurado sa selection committee.
Naaliw raw si Rabiya dahil pinag-rap pa siya, at natuwa raw ang mga judges sa ginawa niyang rap, lalo na ang dalawang dating Miss Universe.
Nasagap nga ng PEP Troika na ang dalawang dating Miss Universe na judges sa Miss Universe 2020 ay si Miss Universe 1997 Brook Lee (from USA) at si Miss Universe 2006 Zuleyka Rivera (from Puerto Rico).
Si Zuleyka ay isang actress, TV host, model, at entrepreneur ngayon; habang si Brook ay creator, host, at executive producer ng isang women magazine show sa Hawaii.
Women empowerment pa rin ang tema nila kaya pawang mga babaeng judges ang pinaupo sa timpalak.
Ang anim pa sa selection committee ay sina Sheryl Adkins-Green (American marketing executive), Arden Cho (American actress), Christine Duffy (American businesswoman), Keltie Knight (Canadian TV host), Deepica Mutyala (American entrepreneur), at Tatyana Orozco (Colombian economist).
Anong meron kaya sa isang kandidata na tingin nila karapat-dapat na kokoronahang Miss Universe 2020 sa gitna ng pandemya?
Sabi ng runway coach na si Lu Sierra sa isang interview na nasilip ko sa Tiktok; “Miss Universe does not model. She speaks. So, can she speak clear so that the auditorium will listen to her? Do her eyes light up? Does she smile when she talk? Is her posture good or is her posture bad and eyes are looking down?
“She’s a diplomat and her job is to pull in the audience when she’s speaking to the girls.”
Tama ba si Madam Lu Sierra, mga ka-Troiks?
NOEL FERRER:
Ako, ito ang pinakamahalagang parte ng kumpetisyon—ang ipahayag ang saloobin mo tungkol sa mga issue at mga prinsipyo mo sa buhay.
Sana, makuha pa rin ni Rabiya ang kanyang momentum sa swimsuit at long gown preliminaries bukas, hanggang sa pageant finals sa Lunes.
JERRY OLEA:
Walumpo (80) ang mga kandidata sa Miss Universe 2015, kung saan kinoronahan ni Paulina Vega ng Colombia ang successor niyang si Pia Wurtzbach.
Kontrobersyal ang timpalak nang i-announce ng host na si Steve Harvey na ang winner ay si Ariadna Gutierrez ng Colombia. Wow, mali!
Siyamnapu’t apat (94) ang mga kalahok sa Miss Universe 2018, kung saan kinoronahan ni Demi-Leigh Nel-Peters ng South Africa si Catriona Gray.
So far ay ito ang pinakamalaking bilang ng mga kalahok sa Miss U. Hosts noon sina Steve Harvey at supermodel Ashley Graham.
Nagbigay ng commentary at analysis sina Lu Sierra at TV personality Carson Kressley.
Pitumpo’t apat (74) ang mga kandidata sa Miss Universe 2020, kung saan kokoronahan ni Zozibini Tunzi ng South Africa ang kanyang successor.
Ang hosts ay sina Mario Lopez at Miss Universe 2012 Olivia Culpo. Expert analysts sa timpalak sina Paulina Vega at Demi-Leigh Nel-Peters Tebow, samantalang backstage correspondent si Miss USA 2019 Cheslie Kryst.
Magpe-perform ang American rapper and singer na si Pitbull. Abangan natin kung magiging mabisa ang agimat ni Rabiya Mateo na galing kay Pia Wurtzbach.