GORGY RULA
Dahil sa pagkalat ng Omicron variant, wala munang family get-together sa tahanan ng mag-asawang Vic Sotto at Pauleen Luna.
Ipinagdiriwang nila ang kanilang 6th wedding anniversary ngayong araw, January 30, 2022. Sila lang daw, kasama ang anak nilang si Tali, ang nag-celebrate.
Mas matindi ang pag-iingat nila dahil hindi pa bakunado si Tali, kaya pa-order-order muna sila ng pagkain online at silang tatlo lang ang nag-celebrate.
Dati kasi ay nakakasama pa nila ang lahat ng mga anak ni Bossing Vic, pero hindi muna nila ito nagagawa sa ngayon.
Anim na taon nang kasal sina Vic at Pauleen, pero sampung taon na ang kanilang relasyon. Biniyayaan sila ng isang anak na si Tali.
Isang wish niya sa kanilang wedding anniversary ay madagdagan ng isa pang baby ang kanilang pamilya.
Pero ang text sa akin ni Pauleen: “Yung baby, di pa hehehe!”
Ayaw kasi ni Pauleen na magpa-pressure.
Nung Sabado, January 29, ay nag-post si Pauleen sa Instagram ng litrato nila ni Tali. Sabi niya sa caption: “Forever you and me (still praying for a baby sis/bro for Tali bachuchi tho!)”
Happy wedding anniversary kina Bossing Vic at Pauleen Sotto!
JERRY OLEA
Better safe than sorry.
Ayon sa nakalap na datos ng Department of Health ay 16,953 ang karagdagang kaso ng COVID-19 sa bansa ngayong Enero 30, Linggo.
Kahit ibababa na sa Alert Level 2 ang Metro Manila, Cavite, Bulacan, at Rizal umpisa Pebrero 1, Martes, Chinese New Year, mas makabubuting mag-ingat pa rin sina Bossing Vic at Pauleen sa kanilang 6th wedding anniversary na Omicron-free!
May hugot at patama si Pauleen sa Instagram post niya ngayong Sunday morning.
Bahagi ng IG message ni Pauleen para sa asawa: “The start of our relationship was very challenging.
“A lot of people didn’t want us to succeed. People who knew so little about you and me.
“So, just like with a lot of things in my life, this part I’ve surrendered to God…”
Para kay Pauleen, si Bossing Vic ang “best husband” na pinili ng Panginoon para sa kanya, at ipinagpapasalamat niya iyon gabi-gabi.
Emote pa ni Pauleen, “This pandemic has definitely proven that your heart was made for mine and mine for yours.
“Thank you. Thank you for loving me, for letting me be myself, for looking out for me, for giving me a sense of security, for always making me laugh and most of all, for giving me so much respect…”
NOEL FERRER
Kayang-kaya pa nilang makabuo ng kapatid ni Tali… nandoon pa ang passion, at may time naman ngayon.
Kasama tayo sa natutuwa na maayos ang relasyon ng mag-asawang Poleng at Bossing.
Bukod sa sarili nila, hindi lang nila pinagsasabi, pero ang dami nilang natutulungang ibang taong nangangailangan ngayong pandemya.
Basta, sana’y lalo pang maging daan ng kabutihan at malasakit sa kapwa ang mag-asawang Poleng at Bossing… at kasama tayo sa mga nananalangin para sa kanilang habambuhay na pagsasama.
Happy 6th Anniversary and Happy Forever sa inyo!