GORGY RULA
Isa sa madalas na ikinakantiyaw kay Aga Muhlach ay ang pagiging kuripot nito.
Natatawa na lang ang aktor, kaya natutukso siyang pahirapan daw maharbatan.
Pero lingid sa kaalaman ng karamihan, ang dami nang natulungan ni Aga at nabago ang buhay, pero tahimik lang siya at hindi niya ito ipinagyayabang.
Naibahagi lang ito ng aktor nang napag-usapan na ang pagtulong sa bago niyang programang Bida Kayo Kay Aga na mapapanood simula March 26 ng 7:00 pm sa Net 25.
Ito ay isang feel-good, inspirational reality show na magpapakita ng kabutihang puso ng mga ordinaryong Pinoy.
Ani Aga, “Mula nung binata ako, hindi ko lang nasasabi, madami akong natulungan talaga.
“Madami akong napasayang tao, at hanggang ngayon pag binabalik-balikan ko yun, meron akong mga pamilyang, mga anak nilang napagtapos ko ng pag-aaral. Meron akong nabigyan ng shelter. Meron akong nabigyan ng hanapbuhay.
“Ngayon ko lang pag-uusapan ito, and even now, sabi ko walang tatalo talaga sa ligayang nakikita ko sa kanila na tuwang-tuwa sila, yung pasasalamat nila na dahil dun, hindi ko kasi sila nabigyan ng poot, binigyan ko sila ng buhay.
“Nabigyan ako ng pagkakataon na tumulong sa kanila nang lubus-lubusan. And hanggang ngayon, hindi makakalimutan na para sa akin, yun ang nagpabida sa puso ko na itong mga taong ito, in my own little way, I was able to save a lot of people, ang natulungan ko through the years mula nung binata pa ako.”
Ngayon ay nararamdaman daw niya ang kakaibang tuwa kapag lumalabas siya para kapanayamin ang ilang pini-feature nila sa Bida Kayo Kay Aga.
Iba raw talaga ang feeling kapag nakikita ang sobrang tuwa ng mga taong nabibigyan nila ng tulong, lalo na pag sinorpresa sila ni Aga na siya pala ang mag-iinterbyu.
JERRY OLEA
From ABS-CBN, lumipat si Aga sa TV5, at bumalik kapagkuwan sa Kapamilya Network. Ngayon ay nasa NET 25 naman siya.
Sa mga Top 20 programs everyday ng AGB Nielsen NUTAM Ratings ay ratsada ang accumulated ratings ng GMA-7 at GTV, at pumapasok ang kumbinasyon ng ratings mula sa TV5, A2Z, Kapamilya Channel, Cine Mo, Jeepney TV at Teleradyo.
Siyempre, meron din yung sa GMA-7 lang, GTV o TV5.
Hindi mapasusubalian na isa si Aga sa pinakamahuhusay na artista ng local showbiz.
Wish ko lang na mapanood muli si Aga sa isang palabas sa GMA-7, GTV o TV5, sa drama man o comedy, o kahit sa paghu-host.
NOEL FERRER
Sana, mapanood natin si Aga at his best. Ngayon, nag-e-enjoy lang siya sa kanyang hosting.
Alam ko, may magandang offer sa kanya para isang magandang relevant drama.
Sana tanggapin niya ito!
Nakaka-miss si Aga in his acting element.