JERRY OLEA
Kumandong si Me-ann (Heaven Peralejo) sa sugar daddy niyang si Chief (Ian Veneracion) sa pelikulang Nanahimik Ang Gabi.
Naramdaman ba ni Ian na may hesitation si Heaven sa kissing or seduction scenes?
“Hindi, e. Nasa mode ako nung Chief, e. So, yung character ko, medyo dark talaga na malisyosong ano, e,” lahad ni Ian sa mediacon noong Disyembre 13, 2022, Martes, sa Director’s Club ng The Block, SM North EDSA, Quezon City.
“So, wala. Kahit kumandong siya or ano, nandun din ako sa mode na in character din, e. Saka siya, kumakandong naman siya not as Heaven, e. Nakikita ko, si Me-ann.
“Yun, sakto sa karakter niya. Kaya din siguro wala kaming ilangan. Kasi alam namin, malinaw sa amin pareho, we’re both in character.”
Read: Ian Veneracion plays sugar daddy to Heaven Peralejo in Nanahimik ang Gabi
Sundot ni Ogie Diaz na facilitator ng Q&A, “So, kung naka-in character kayo, Ian… may nag-react ba sa kandungan scene?”
Natigilan nang ilang sandali ang 47-anyos na aktor bago sumagot, “Parang… Seiko Films ba ito? Nung 90s. ST. ST ba ito?”
Pabirong hirit ni Ogie, “Vivamax.”
Hirit ni Ian, “Alam mo, Jun Macarrubo…”
“Ang luma!” sambit ni Ogie.
Si Jun Macarrubo ay in charge ng publicity and promo ng Seiko Films ni Robbie Tan.
Namayagpag ang Seiko Films noong 1990s sa pagpo-produce ng ST (sex trip) movies. Tinagurian noon si Gretchen Barretto bilang "ST Queen" dahil sa pagpapa-sexy nito sa mga pelikula ng Seiko.
Suspense thriller ang Metro Manila Film Festival (MMFF) 2022 official entry na Nanahimik Ang Gabi, na isinulat at idinirek ni Shugo Praico. Prinodyus ito ng Rein Entertainment, at tampok din dito si Mon Confiado.
Sabi ni Ian, “Actually, sexy yung movie in terms of psychological. And yun nga, it’s medyo twisted in many ways.
“Kita niyo naman yung handcuffs, yung mga ganung scenes, saka yung mga swimsuit scenes ni Heaven.
“Ahhmm, nakaka-excite kung ano ang magiging reaction ng mga manonood. Pero yung iba kasi, parang… halu-halo, e.
“Yung iba, puwede mong isipin, ‘Ay! Naku, they’re promoting sex!’ Yung others naman, sasabihin nila, ‘Oh, it’s good, they’re pointing out certain things na mali sa society.’ Yung ganun.
“So, iba-iba sila. Until mapanood nila yung buong pelikula, saka lang natin makikita yung feedback.”
GORGY RULA
Natuwa si Ian Veneracion nang mapanood ang ilang eksena ng Nanahimik Ang Gabi bago simulan ang Q&A sa mediacon.
“Matagal akong hindi nakapasok sa sinehan. Iba pa rin talaga pag ganyan ka-big screen kahit na snippet lang ang pinanood natin,” sambit ng aktor.
“Parang nakaka… nakakatuwa lang na eto, ganito, ang dami natin dito sa loob uli ng sinehan.
“And hopefully, mag-translate iyon sa Metro Manila Film Fest na magbalik-sine ang mga tao talaga. Kasi, iba! Iba talaga pag big screen.”
Umaasam ba si Ian na tanghaling best actor ng 48th MMFF?
Napakunot-noo si Ian, “Hmmn, ewan ko. Parang hindi yun ang motivation naman para mag-shoot or para gawin ang eksena.
“Pag meron, meron. Pag wala, wala. It doesn’t really ano... parang hindi naman siya goal.
“Pero itong script kasi nga, yung movie, andaming pino-pose na questions, e, about us, about our society.
“It’s not a movie that promotes, for example, violence. It’s actually pointing out certain things na parang… katulad nun, napakarami nating kilala na may sugar daddy, sugar mommy, sugar ganyan.
“Pero sa society natin, parang naging OK na. Naging tanggap na, di ba? Pero sa totoo, yung mga anak ba natin, gusto ba nating maging sugar baby? Sugar daddy, sugar, you know. Yung mga ganun.
“So, andaming mai-introduce na mga tanong din sa sarili natin pagkatapos nating mapanood ito.
“Saka yung mga bagay na, yun nga, hanggang kailan tayo mananahimik sa mga certain moral issues? At saka iku-question yung values natin.
“So, yun yung start ng buong project na ito nung nabasa namin lahat ang script. Talagang WOW! Saka ang hirap hulaan kung saan papunta kaya excited kami ipakita sa lahat.”
NOEL FERRER
Ang Nanahimik Ang Gabi ang action film sa MMFF 2022 (ang isa’y historical na) kaya malakas din ang appeal nito lalo na sa broad male audience. Tapos, may Heaven Peralejo pa na pambagets.
Sana, kumita ito nang malaki sa takilya.
Tama si Ian, iba pa rin ang big theater experience. Sayang ang mga action scenes kapag hindi big screen complete with Dolby Sound for full experiential feels.
Sana, ito na rin makaengganyo sa Rein Entertainment na gumawa pa ng magaganda at kakaibang pelikula na hahamon sa sensibilidad ng mga kababayan natin!
Sana nga, maibalik ang saya at sigla sa pelikula with Nanahimik Ang Gabi.