JERRY OLEA
Ang Wednesday ang ikatlo sa talaan ng most watched series ng Netflix sa loob ng 28 araw.
Ang nasabing supernatural mystery comedy horror TV series na pinagbidahan ni Jenny Ortega ang ikatlong Netflix series na lumampas sa isang bilyon ang viewing hours in 28 days.
Nanatiling all-time favorite ang South Korean series na Squid Game, na may 1.65B of viewing hours sa kaparehong time period. Ang Squid Game din tanging ang non-English sa Top 10 TV Shows na may pinakamaraming viewing hours sa unang 28 araw ng pagpapalabas.
Ang pangalawa sa listahan ay ang Stranger Things: Season 4 na may 1.35B hours, at pangatlo nga ang Wednesday na humamig ng 1.02B viewing hours.
Ang dating nasa pangatlong puwesto ay Dahmer: Monster — The Jeffrey Dahmer Story (856M viewing hours).
Ang anim pang nasa Top 10 ay Bridgerton: Season 2 (656M viewing hours), Bridgerton Season 1 (625M viewing hours), Stranger Things: Season 3 (582M viewing hours), Lucifer: Season 5 (569M viewing hours), The Witcher: Season 1 (541M viewing hours), at Inventing Anna (512M viewing hours).
Sa pag-entra ng Wednesday, naligwak sa Top 10 ang 13 Reasons Why: Season 2 (496M viewing hours).
Sa Netflix Philippines, as we write this ay namamayagpag pa rin ang Wednesday sa Top 10 TV Shows Today.
Dalawang Pinoy series ang nasa Top 10 TV Shows ngayon ng Netflix Philippines.
Nasa pangwalong puwesto ang First Lady ni Sanya Lopez, at pansiyam ang 2 Good 2 Be True nina Kathryn Bernardo at Daniel Padilla.
Ang pito pang series sa Top 10 ay Money Heist: Korea — Joint Economic Area (2), Alchemy of Souls (3), Sonic Prime (4), Harry & Meghan (5), Under the Queen’s Umbrella (6), Lookism (7), at The Recruit (10).
Kabilang sa mga inaabangan nating serye na mag-i-streaming sa Netflix ang Emily in Paris: Season 3 (Disyembre 21, Miyerkules), The Interest of Love (Disyembre 21, Miyerkules), Alice in Borderland: Season 2 (Disyembre 22, Huwebes), The Fabulous (Disyembre 23, Biyernes), The Witcher: Blood Origin (Disyembre 25, Linggo), Trolley (Disyembre 26, Lunes), at The Glory (Disyembre 30).
GORGY RULA
Isa lamang ang gawang-Pinoy sa Top 10 Movies ng Netflix Philippines today—ang 1991 film na Hihintayin Kita Sa Langit starring Richard Gomez and Dawn Zulueta.
Number 1 sa talaan ang Bullet Train ni Brad Pitt. Noong Agosto 10 ito ipinalabas sa local cinemas.
Pangalawa ang 2022 Indonesion film na The Big 4. Pangatlo ang animated na Guillermo del Toro’s Pinocchio. Pang-apat ang Norwegian film na Troll, na may bahid ng King Kong at Godzilla. Panlima ang 2007 action film ni Mark Wahlberg na Shooter.
Ang apat pang pelikula sa Top 10 Movies ng Netflix Philippines today ay God’s Crooked Lines, Good Will Hunting, A Bad Moms Christmas, at Lady Chatterley’s Lover.
Coming soon sa Netflix Philippines ang mga pelikulang The Roundup (Disyembre 20, Martes), Glass Onion: A Knives Out Mystery (Disyembre 23, Biyernes), Clarita (Disyembre 28), at The Invitation.
NOEL FERRER
Nagulat ako nang malaman ko na may ibang films na 45 days after the theater showing ay diretso na sa Netflix o iba pang streaming service.
Akala ko kasi noon, sa mga MMFF entries, napapakiusapan ang entries hanggang sa six months bago mag-streaming para ma-maximize ang theater run nationwide or internationally.
Kaya umaasa tayo na kahit tuloy ang ating suporta sa streaming platform like Netflix, Amazon Prime, Disney+, HBO Go, at iba pa, sana’y mas taimtim ang ating panalangin na magbalik na sa sinehan ang mga nagmamahal sa pelikula.
At masusubok ulit natin iyan sa darating na 48th Metro Manila Film Festival na ang tema ay "Balik Saya."
Sa Disyembre 21, Wednesday ng hapon ang MMFF 2022 Parade of Stars na mag-uumpisa sa Welcome Rotonda ng Quezon City, babagtas ng Quezon Avenue patungo sa Quezon Memorial Circle na katapat ng Quezon City Hall.
Sa Disyembre 25, Linggo ang umpisa ng filmfest, at sa Disyembre 27, Martes ang gabi ng parangal sa New Frontier Theater ng Cubao, Quezon City.