JERRY OLEA
As expected, nanguna muli sa takilya ng North America last weekend ang Guardians of the Galaxy Vol. 3 (GOTG V3).
Nitong Mayo 12-14 na ika-19 weekend ng 2023, ang GOTG V3 ay humamig ng $62M sa box office ng U.S. at Canada.
Pumangalawa rito ang The Super Mario Bros. Movie na naka-$12.6M on its sixth weekend.
Pangatlo ang bagong bukas na Book Club: The Next Chapter na naka-$6.7M.
Worldwide, nasa unang puwesto pa rin ang The Super Mario Bros. Movie na $1.21B na ang global gross.
Pangalawa na rito ang Guardians of the Galaxy Vol. 3 na naka-$536M na. Marvelous!
Nilampasan na nito ang Ant-Man and the Wasp: Quantumania ($476M).
Read: Director James Gunn, sinagot ang tanong ng fans tungkol sa Guardians of the Galaxy Vol. 3
Ang iba pang malalakas na pelikula worldwide this year ay John Wick: Chapter 4 ($421M), Creed III ($274M), Dungeons & Dragons: Honor Among Thieves ($204M), Scream VI ($169M), Shazam! Fury of the Gods ($133M), Evil Dead Rise ($132M), at ang Indian Hindi action-thriller na Pathaan ($129).
Kakaripas na ngayong Mayo 17, Miyerkules, sa local cinemas ang action film ni Vin Diesel na Fast X.
Kasama sa cast nito sina Michelle Rodriguez, Jason Statham, Jason Momoa, John Cena, Helen Mirren, Charlize Theron, at Rita Moreno.
“The race for family just can't wait!” anunsiyo ng Cinema Exhibitors Association of the Philippines (CEAP) sa kanilang Facebook page.
May special 12:01 a.m. Fans' screening ang Fast X kanina sa mga piling sinehan.
Humahabol sa Fast X ang comedy movie nina Chad Kinis, Mc Muah, at Lassy na Beks Days of Our Lives, na si Chad Kinis mismo ang nagdirek.
Kakampi ng mga beks sa bardagulang ito sina John “Sweet” Lapus, Debbie Garcia, Ruby Ruiz, John Flores, Pepita Curtis, Divine Tetay, Tonton Soriano, Axel Torres, Kirst Viray, Yuki Zakamoto, at Raven Molina.
Panawagan ni Chad Kinis today sa Facebook, “NOW SHOWING! BEKS DAYS OF OUR LIVES! Sugod na po sa mga sinehan na meron. Sana unahin niyo po panoorin ang Pinoy movie.
“Kami lang po ang local film na ipapalabas this week paban sa dalawang higanteng foreign film. Sana po unahin niyo panoorin ang pelikula namin. Support pinoy movie.
“Sure ako na sasakit tiyan niyo kakatawa. Promise yan!”
Exclusive na magso-showing sa SM Cinemas starting also this Wednesday ang animated film na Detective Conan The Story of Ai Habara: Black Iron Mystery Train, pati ang Thai horror thriller na Home for Rent, na inspired from true events.
Sa Mayo 24 naman ay lalangoy na sa local cinemas ang musical fantasy film ni Halle Bailey na The Little Mermaid.
Sa Mayo 31, magpapakitang-gilas ang computer-animated na Spider-Man: Across The Spider-Verse.
At sa Hunyo 7, magpapasiklab ang sci-fi action film na Transformers: Rise of the Beasts, kung saan tampok ang Autobots na sina Optimus Prime, Bumblebee, Mirage, Arcee, Wheeljack, at Stratosphere.
Andiyan din ang Maximals na sina Optimus Primal, Airazor, Rhinox at Cheetor, plus ang Terrorcons na sina Scourge, Battletrap, Nightbird, Transit, at Freezer.
NOEL FERRER
Nasaan na ang ibang Pinoy movies? Bumubuti ba ang tsansa ng mga ito na kumita sa takilya? I doubt.
Maghihintay ba tayo para mag-MMFF na naman para may edge na ang mga Pinoy movies na ipapalabas?
As of now, mahigit 40 movies ang nag-submit ng kanilang Letters of Intent para sa posibilidad sa pagsali sa December filmfest. Aabangan natin ang kahihinatnan nito sa mga susunod na mga araw.
GORGY RULA
Sinasanay na rin ng film producers na hindi iasa sa mga sinehan ang ginagawa nilang pelikula. Ang ganda pa raw ng bayaran ngayon sa mga streaming apps kagaya ng Netflix at Prime Video.
Gandahan lang ang pelikula na pasok sa standard ng streaming apps na ito. Kaya tuluy-tuloy lang ang paggawa ng mga pelikula na karamihan ay ginagawa ng mga maliliit na producer.
Natapos na ni Direk Brillante Mendoza ang mga pelikulang Bangsa at Moro.
Tinatapos na ni Direk Joel Lamangan ang Lola Magdalena na title role si Gloria Diaz.
Sana’y Wala Nang Wakas ang peg nina Pokwang, Agot Isidro, at Eugene Domingo sa Becky & Badette ni Direk Jun Robles Lana.
Sina Vilma Santos at Christopher de Leon ay bida sa When I Met You In Tokyo na sa pagkakaalam ni Yetbo ay ika-27 tambalan na nila ng Star for All Seasons.
Read: Vilma Santos, Christopher de Leon, nasa Japan nitong Holy Week
Next week ay lilipad na pa-Australia sina Paolo Contis, Kaye Abad, at Patrick Garcia para sa pelikulang idinidirek ni RC delos Reyes under Mavx Productions. Wala pa silang naisip na final title ng film project na ito.
Read: Patrick Garcia, nakumbinsing magbalik sa pag-arte dahil kina Kaye Abad at Paolo Contis
Bandang June naman ay isu-showing na ang Pangarap Kong Oscars nina Paolo Contis at Joross Gamboa. Sana, maganda ang resulta nito sa mga sinehan.