GORGY RULA
Gagawing series ng Rein Entertainment ang librong Etiquette for Mistresses (1993) ni Jullie Yap-Daza.
Ibang-iba iyon sa pelikulang Etiquette for Mistresses (2015) na pinagbidahan nina Kris Aquino, Claudine Barretto, Iza Calzado, Cheena Crab at Kim Chiu, sa direksiyon ni Chito S. Roño.
Si Mel Mendoza-del Rosario ang magsusulat ng script ng eight-part series.
“Next year pa po yun,” sabi ni Direk Lino Cayetano sa intimate tsikahan nitong Oktubre 18, 2023, sa office ng Rein Entertainment sa Malingap St., Quezon City.
“Malayo sa film ni Direk Chito. Ang kuwento, anthology. Every episode, ibang mag-asawa saka ibang mistress.”
Read: Production company ni Lino Cayetano, pumirma na ng long-term partnership sa Viva Films
Sa ngayon ay naka-focus muna ang Rein Entertainment sa post-production ng pelikulang Elevator, na nagsyuting ng sampung araw sa Singapore.
Bida sa romance-comedy na Elevator sina Paulo Avelino, Kylie Verzosa, at ang Singaporean actor na si Adrian Pang.
Isinulat at idinirek ito ni Philip King. Co-producers dito ng Rein Entertainment ang Viva Communications at Cineko Productions.
Ang Cineko ang producer ng MMFF 2022 official entry na Family Matters, na idinirek ni Nuel Naval mula sa panulat ni Mel Mendoza-del Rosario.
Ang Rein Entertainment naman ang producer ng MMFF 2022 entry na Nanahimik Ang Gabi, na pinagbidahan nina Ian Veneracion, Heaven Peralejo, at Mon Confiado, sa direksiyon ni Shugo Praico.
Kakumpitensiya before ng Rein ang Cineko ni Pandi Mayor Enrico Roque, and then nagsanib-puwersa sila sa Elevator.
Sabi pa ni Direk Lino, “We made a deal with Viva na sila ang distributor. So, uupo pa kami with them kung paano nila ire-release.
“Gusto namin, may premiere night dito, and may premiere night din sana sa Singapore. Kasi, kalahati ng cast ng Elevator, Singaporean.”
Magpo-focus din ang Rein Entertainment sa follow-up project ni Direk Shugo, ang horror thriller na Caretakers. Nagka-casting pa lang dito ang Rein Entertainment.
“Acting piece din siya. Lahat ng dinirek ni Shugo, nananalong best actor, e,” sambit ni Direk Lino.
“Kasi, sa Bagman, nanalo si Arjo Atayde. And then after nun, Nanahimik Ang Gabi. Si Ian, Heaven, Mon, nanalo.
“So itong pangatlo, really ensemble. Dalawang pamilya. Yung Caretakers, mga nagbabantay ng bahay.
“And then we’re likely working with Regal. Kasi yung Rein talaga, parang we like to collaborate.”
Masaya sila sa kinahinatnan ng Nanahimik Ang Gabi.
Lahad ni Direk Lino, “Although sa takilya, OK lang pero ang daming lumalapit sa amin because of Nanahimik Ang Gabi.
“Kasi of course, di ba, nag-best actor si Ian, nag-best actress si Heaven. And then ngayon, first time nga, na-nominate pa si Heaven sa Asian Academy Creative Awards [AAA].
“Last year, ang nanalo sa Philippines, yung OJT 2: The Missing 8 sa Asian Academy. Ngayon, yung Nanahimik Ang Gabi ang nanalo.
“So, medyo big deal. Nanalo ng best script, best movie, and then nanalo ng best supporting si Mon. And then best actress si Heaven.
“Two years ago, yun naman yung nanalo si Arjo, sa Bagman. Asian Academy rin.
“Ang kaibahan po ng Asian Academy, industry-run po siya. Parang… unlike yung ibang festivals, eto, ang bumubuo nito, mga taga-industriya.”
Babalik ang Rein Entertainment sa Singapore sa December para sa grand finals ng Asian Academy Creative Awards.
“Natuwa nga kami, kasi, most of the awards… GMA, ABS-CBN saka Rein,” pagngiti ni Direk Lino.
“So parang sabi ko, ang sarap makasama kahit napakaliit namin. Parang… the Filipino winners na magre-represent would be ABS-CBN, GMA, saka kami dun sa Drama.”
Sina Shugo Praico, Lino Cayetano, at Philip King ang partners-producers ng Rein Entertainment. Ang managing producer ng company ay si Charm Guzman.
Read: Heaven Peralejo, National Winner for Best Actress sa Asian Academy Creative Awards 2023
(From left) Shugo Praico, Philip King, Charm Guzman, and Lino Cayetano
NOEL FERRER
This puts Rein Entertainment in the big league sa mga content creators. Kasi, kahit bago pa lang na kumpanya, maganda na ang output at may recognition pa not just in the country but in Asia.
This should make investors and co-collaborators trust in Rein Entertainment all the more.
Ang tanong, after Shugo and Philip directing their projects, kailan naman gagawa si Direk Lino ng isa na namang magandang obra? Sana soon! And we are all looking forward to that!
Basta, we are supportive of the efforts of Rein Entertainment. Kasi, hindi lang sila mahusay, mababait pa sila.
Marami pa silang ganyan sa industriya. At narito lang tayo para suportahan ang ganitong efforts.
JERRY OLEA
Bilang viewer, sobrang excited si Direk Lino Cayetano na ginawang sampu ang official entries ng 49th Metro Manila Film Festival.
Read: MMFF 2023 official entries: Romance, drama, horror, comedy, fantasy, action
“As a producer, I hope everyone makes money. Makes money because when the film makes money, then we can produce more movies and more people can enjoy Filipino films,” saad ni Direk Lino.
“As a viewer, excited ako. Kasi, andami kong mapapanood. Pero sana, magkapit-kamay hindi lang yung industriya, but all the Metro Manila mayors.
“Sana, hindi lang free tickets. Sana yung Metro Manila mayors, mag-sponsor.
“Kasi, naging mayor ako, e. Binibigyan kami ng libreng tickets. Bakit hindi natin baligtarin? Bakit hindi tayo bumili ng maraming tiket para makapanood ang mga kababayan natin?
“Para mas maraming mga producers at pelikula ang kumita. And the masaya pa ang mga constituents natin. So, I hope more people watch this next MMFF.”
Nag-make money ba iyong Nanahimik Ang Gabi sa MMFF last year?
Tugon ni Direk Lino, “Sa MMFF, OK lang. Pero dahil kinuha kami ng Prime Video saka GMA… yung GMA, early on nagustuhan yung pelikula, binili na kaagad nila pero ipapalabas pa yan sa GMA, siguro next year.
“And then yung Prime Video, hindi pa naipapalabas sa cinema, prineview na nila, nagustuhan na nila.
“And tama nga yung pusta nila. Kasi like now, in the Asian Academy Awards, bitbit namin ang Prime Video saka ang GMA-7 dun sa award.”
Kung gayon, bakit hindi sila lumahok sa MMFF this year? Bakit “nanahimik” sila
Napangiti muli si Direk Lino, “Siguro we’ll try again next year. Siguro hindi lang umabot yung materyal namin.
“E, ayaw naming mag-submit for the sake of parang ang taas ng respeto namin sa MMFF.
“Ayaw naming basta maghabol na hindi pa siya handa. So yun, yung ginagawa ni Direk Shugo ngayon, yung Caretakers.
“We’ll shoot hopefully December. Pero next year pa iyon maipapalabas. Iyong Elevator naman, kakatapos lang mag-shooting.
“E, ang requirement, finished product. So, hindi rin namin hinabol.”
Siyanga pala, pinarangalan ang Rein Entertainment bilang Rising Producer of the Year sa 5th Eddys Awards ng SPEEd (Society of Philippine Entertainment Awards) noong Nobyembre 2022 sa Manila Metropolitan Theater.
Sa darating na 6th Eddys ay nominado ang Nanahimik Ang Gabi sa labing-isang kategorya, kabilang ang best actor, best actress, best supporting actor, best picture, best director at best screenplay.